Sunday, December 10, 2006

شخصيات ومواقف


شخصيات ومواقف


Fight


عمرو صلاح

في مرحلة الطفولة كان عمرو صلاح هو أحد الجيران الذي يكبرني بعامين وكان الكل يتجنبه فقد كان عمرو بالرغم من قلة حجمه الملحوظة إلا إنه كانت يتمتع بلسان سليط يوجهه على الجميع بإسلوب لم نعتاد عليه في تلك المرحلة الطفولية فتعجز ألستنا عن الرد ويكيل بلسانه أفظع الشتائم للجميع بلا إستثناء وبفضل لسانه كنا نعتبره أقوى شخص فكان الجميع يتجنبه بالرغم من محاولاته المتكررة لإفتعال مشاجرة ننجح في تجنبها ، وكان إذا أراد منا أحد أن يهدد آخر يضايقه يقول له إنه سوف يشتكيه لعمرو صلاح ، وكان المارة العابرين لايسلمون من لسان عمرو صلاح والعجيب أنهم كانوا هم الآخرين يدعونه وشأنه ، حتى جاء يوم يلعب فيه أحد الاشخاص الغرباء في الحديقة التي يطل عليها شباك منزل عمرو صلاح ، فما كان من عمرو إلا أن شتمه وتوعده بالويل والثبور وعظائم الامور إذا لم يمشي فورا ، تعجب الولد ورفض المشي ورد الشتيمة بالشتيمة فما كان من عمرو إلا أن قفز من شباك الدور الارضي ليلقن الولد الغريب درسا لن ينساه ، وقف الولد مكانه وماأن إبتدأ عمرو بالعراك حتى أوقعه الولد على الارض وكال له اللكمات يمينا ويسارا وسال الدم من عمرو من كل إتجاه ولم ينطق الولد بكلمة وتركه جثه هامدة إلا ان لسان عمرو رفض الصمت وخرج بصعوبة يتوعد الولد وهو مغادرا قائلا وكل يوم من ده .. هاحرمك تعدي من هنا
----------------------

Date Roll


نظمي
دخلت كلية هندسة ونظمي طالب بالبكالوريوس ووصلت البكالوريوس ونظمي مازال طالبا به ، كنت اجلس في مقر الأسرة الجامعية بحديقة الكلية مع إحدي الزميلات وحدنا وبيدي قطعة بسكويت بالعجوة وبما أنه لم يعجبني طعم العجوة فأكلت البسكويت وتركت العجوة أكورها بين أصابعي فدخل علينا نظمي متسائلا عما في يدي فنظرت بين أصابعي ثم قلت له ده حشيش لما علمت سابقا بأن الحشيش يشبه العجوة فإقترب نظمي مني ممسكا يدي متفحصا إياها و قال لي دي عجوة ، ثم مد يده الى جيبه مخرجا قطعة مغلفة بالسوليفان قائلا ده الحشيش
------------------------

Video Tape


أبو بكر
أيام الجامعة كان أبو بكر هو الشخص الثري الذي يعمل والداه بدبي تاركين له فيلا وسيارة ومال وكان أبو بكر يحمل ملامح قاسية لاتنم عن طيبته الكبيرة وكان يريد أن يبدو دائما بصورة الشاب الروش ، وفي يوم ذهبنا أنا وهو وعصام نسهر عنده فمر على أحد المحال ليحصل على فيلم ثقافي فقد كان الوحيد بينا الذي لديه فيديو واحضرالشريط وذهبنا الى فيلته وأبو بكر ممنيا نفسه بسهرة رائعة معداً لها ساندويتشات جاهزة ومياه غازية وتسالي ، ودار الشريط ويظهر فيلم يدور في الأدغال ويخبرنا أبو بكر إنه فيلم رائع رآه سابقا ويدو الفيلم ولاحس ولاخبر ربع ساعة .. نص ساعة .. وتظهر ضحكات مكتومة من عصام لم يلحظها أبو بكر إلا بعد حوالي ساعة تقريبا مغلقا الفيديو ويلقي بالشريط على الأرض وهو يسب ويلعن صاحب محل الفيديو لينفجر عصام ضاحكا ً فقد إنتهز فرصة تجول ابو بكر داخل المحل مشاهدا بعض صور الشرائط ليستبدل الشريط من البائع بشريط عادي فقد أوصى والدا أبو بكر عصام عليه ، وكانت ليلة لم تخلو من الضحك طول الوقت على حال أبو بكر وهو ممنيا ً نفسه بسهرة حمراء ، آه نسيت أقول إن أبو بكر طردنا يومها من بيته

------------------------

Mobile


حسن فوزي
كان حسن من الشخصيات ما أن تحكي لها موقف حدث لك حتى يقاطعك ليحكي لك موقف مشابه ، ومن الممكن أن يحكي عشرة مواقف مشابهة لعشرة مواقف تحكيها في المرة الواحدة ، وبما أن الحكايات لاتمر عندي مرور الكرام فكنت أكتشف دائما الثغرة التي تبين كذب كلامه ، فمثلا تحكي موقف حقيقي حدث لك فيقاطعك بحكاية موقف مشابه حدث له منذ سنوات بعيدة ومن التفاصيل يحكي إنه إتصل بأحد زملائه بالموبايل علما بأن الموبايل لم يكن قد ظهر وقتها ، أحكي له يوم ماضاع الموبايل يحكي لك أنه فقد الموبايل الذي بيده وكان يسير بين الحدائق فوجد ضوء يطفئ وينير بين الحشيش وماهو إلا تليفونه الذي فقده ، أنظر لجواله أجده من النوع الغير مزود بلمبة الإستقبال التي تطفئ وتضئ ، وهكذا هو حسن فوزي
------------------------------


Dirty Cup


المرأة المجهولة
عملت في الأجازة الصيفية بمشروع أقامه مجلس المدينة لشباب الجامعة يستغل فيها طاقة وثقافة شباب الجامعة وكان المشروع عبارة عن تطوير حديقة عامة على النيل لتحويلها لحديقة خاصة يديرها الشباب فترة الصيف ثم يسلمها بعد ذلك لمجلس المدينة ونظرا لخصوصية الحديقة بعد تحويلها كانت مضاءة إضاءات خافتة تساعد على الجو الرومانسي وكانت كميات من الماء تغطي بعض مناطق الحديقة مكونة نجيلة موحلة ، وجاءت إحدى الفتيات البيئة وجلست قالت لي والنبي ياسمك إيه عايزة قبل أي حاجة كوباية ميه
طلبت من شعبان وهو الذي يقوم بدور الجرسون ويعمل بالنهار عامل نظافة في الشارع كوباية المية الساقعة وما أن قدمها لها حتي سكبتها على حذائها الذي توحل بالطين ، ثم طلبت كوبا ً آخر ونظراً لندرة المياة المثلجة طلبت من شعبان كوب مياه من جردل المياه المعكرة الذي توجد فيه زجاجات المياه الغازية وما أن قدمه شعبان للمرأة حتى تناولته كله على فم واحد ونظرت لي وقالت ربنا يكرمك ، يبدو أن الإضاءة الخافتة تعمل على تجاوز أمور عديدة
نسيت أقول إن دوري إني كنت آخد الأوردر وأقول لشعبان عليه وأحاسب الزباين والحساب كان تقديري طبقا لطبيعة الزبون

وهناك شخصيات ومواقف أخرى كثيرة عسى تجد طريقها إلى حكاوي يوماً ما
----------------------
في رحلة الحياة قد تتشابه الشخصيات والمواقف مع الآخرين ولكن وقعها يظل دائما مختلفا ً من شخص لآخر

25 comments:

  1. بقالي كتير ما قريتش حاجه رايقه و حلوه كده
    جميله أوي شخصيات في حياتي دي

    ReplyDelete
  2. عجبنى عصام و خوفه على صاحبه
    و عجبتنى قصة المرأة المجهولة
    فيها معانى كتير اوى

    بس ايه اللى فكرك بيهم دلوقتى ؟

    ReplyDelete
  3. اعتقد انكم مسكتوا عمر بعديها طحنتوه
    وفى السوليفانة اللى يخليه فى البكالوريوس
    وعصام كان خايف عليه وانت كنت فين :))
    ههههههههههههههههه الست الى فى الاخر دى هى اللى مشكلة بجد

    ReplyDelete
  4. أنا عاجباني حكاية كوباية المية .. ياتري الواحد فينا شرب كام كوباية مية وسخة في حياته

    ReplyDelete
  5. يعني عمرو طلع بوق

    ونظمي طلع حشاش

    وأبو بكر طلع منظر

    وحسن فوزي طلع ببغاء

    والمرأه المجهوله
    طلعت شاديه

    وياما في حياتنا قصص لنماذج مشابهه

    ReplyDelete
  6. تعرف محمود؟ اللي ساكن جنب البنزينة وتحتيه واحد بتاع عصير قصب
    :)

    ReplyDelete
  7. لذيذة قوي، ويظهر ان فيه في حياتنا حسن فوزي كتير
    أما كوباية المية، فبالهما والشفا

    ReplyDelete
  8. جميله أوي الذكريات دي

    ReplyDelete
  9. جميل رصيد ذكرياتنا الجميله مع اصدقاءنا او حتى الاشخاص اللى بتمر فى حياتنا

    استمتعت بحكاياتك عنهم

    ReplyDelete
  10. اجمد شخصية هي عمرو صلاح

    ReplyDelete
  11. كعادتك دائما رائع اقول ايه ولا ايه بس
    علي فكره واحشاني زياراتك عندي وتعليقاتك الجميله
    ولا موضعاتي مش عجباك ولا ايه

    ReplyDelete
  12. بسم الله ما شاء الله علي الذاكرة .. و يا جمال ذكرياتك ..

    يا تري اصدقائك الحاليين بعد فتره طويله من سفرك هتفتكرهم و تتكلم عنهم ؟؟

    ReplyDelete
  13. الموضوع جديد و لذيذ
    انا برضوه عندى شخصيات تشبه اصحابك فى حياتى و اكتر حاجه عجبتنى الصور مع انى مفهمتيش الصوره بتاعت ابوبكر

    ReplyDelete
  14. جميل والله يبو حميد... كثير من هذه الشخصيات تتقاطع معنا شخصيا أو مع أناس تعرفهم

    على فكرة انتا نسيت تقل اي تشابه مع احد الشخصيات في الواقع فا دي مش مشكلتنا خالص

    ReplyDelete
  15. هههههههه الست اللي في الاخر و حكاية الشريط

    :)) تعيش و تفتكر الايام دي

    ReplyDelete
  16. ايه الاسلوب الرائع الممتع ده انت فعلا مدرسه
    بس الفيلم طلع ثقافى ثقافى صحيح

    ReplyDelete
  17. انت حد جميل بجد، وعندك قدرة لاتتوافر كثيرا فى ترجمة احساسك وانطباعتنا عن اللى مروا بحياتنا،
    جميل ان ترى نفسك بعيون الاخرين

    تحياتى

    ReplyDelete
  18. أحمد ازيك
    بجد شخصيات تحفة و مش ممكن تنساها
    بس البنت بتاعة الماية المعكرة دي مقطعة قلبي و الله
    :(

    ReplyDelete
  19. هى العجوة بتاعتك شكلها غريب كده ليه؟؟ههههه

    ReplyDelete
  20. مالكشي حل

    مالكشي حل

    مالكشي حل

    هههههههههههههههه

    ReplyDelete
  21. احمد
    بوست جميل ابتسمت طوال قرائته
    يحمل فى طياته ذكريات جعلتنى اعود الى من هم عندى اقرب لتلك الشخصيات
    احيك على بساطة الكلمات واسلوب السرد الممتع

    من التدوينات السهلة الممتعة
    تحياتى

    ReplyDelete
  22. بوست مميز

    و احمل ما فيه واقعية الشخصيات اللى فيه

    ReplyDelete
  23. karakib
    تعرف إن النوعية دي من الحكاوي كانت هيا اللي في دماغي لما عملت بلوج حكاوي آخر الليل

    shaimaa
    اللي فكرني بيهم دايما الحاجة اللي في لحظة تجلي بيبتدي يفكر في ذكريات الماضي بكل شقاوته

    Taher
    نظمي طبعا شخصية لواحدها تكتب فيها حكايات وحكايات
    موضوع الست اللي في الآخر فعلا كان موقف يهلك من الضحك أيامها

    زبادي
    الغريب فعلا يازبادي انها ماحستش بأي حاجة وشربتها عادي جدا

    MAKSOFA
    جمالك إنك جبتي الخلاصة بتاعة كل شخصية

    ابن مصر
    آه محمود عجوة ابن الحاج عجوة الله يرحمه اللي عند نفق العباسية ؟
    ماعرفوش

    Dr. Zeus
    حسن فوزي ده اكبر شخصية تألف روايات إرتجالية في نفس اللحظة

    sherehan84
    لو دورتي في حياتك هتلاقي عندك مواقف وشخصيا كتير تستحق الحكي

    حنيـــــــن
    انتي كمان اكيد عندك رصيد ذكريات بس محتاج شوية بحث وهتلاقي احسن رصيد

    توتة توتة
    عمرو صلاح طول عمره بق كبير ولسانه طويل بشكل فظيع

    ام العيال
    انتي بالذات انا متاكد إنك عندك مواقف وشخصيات قوية جدا وتقيلة جدا

    daktara
    دايما لما اطب على مدونتك بلاقي الجديد والجميل يادكترة

    Romantic Rose
    ياروز انا دايما باستمد حياتي من ذكرياتي مع الىخرين ودايما فاكر كل ايامي ومواقفي مع اصحابي الماضيين والحاليين

    [ahmEd_H]
    هي الفكرة انا عملتها مرة قبل كده بس كانت تقريب مشابهة شوية ونزلتها بعنوان مواقف من حياتي
    صورة ابو بكر تعبيرية شوية عن شريط الفيديو اللي المفروض كان يشوفه

    حائر في دنيا الله
    تشابه اي من الشخصيات دي معحد في الواقع بصراحة فكرة ماجتش على بالي بس صفة كل شخصية يمكن مطابقتها مع كتير من شخصيات الواقع

    Epitaph
    فعلا من وقت للتاني الواحد بيسترجع المواقف دي اللي زيها كتيييير بس يمكن دول اللي جم على بالي ساعة كتابة البوست

    yasser shams aldien
    اول واحد يعلق في البوست على إسلوب الكتابة ، شكرا على رايك الجميل

    بعدك على بالى
    الماضي شيئمم جدا في حياتي ، دايما بيكون حاضر امام الواحد عشان يقدر يتعامل مع المستقبل

    taty
    يااه فينك من زمان ، فعلا البنت بتاعة المية العكرة دي حالة نادرة بس المشكلة ان مابانش عليها اي حاجة

    shady
    ههههههه ، فاهم قصدك بس اعمل ايه هيا شكلها في الصورة طلعت كده

    ادم المصري
    لا ليا حل وبسيط جدا بس مش هاقولك عيه

    tota
    حقيقي دايما باسعد بتعليقاتك وميرسي جدا على اشادتك باسلوب الكتابة

    hesham
    دايما واقعية الشخوص والاماكن بتدي مصداقية للمتلقي ، شكرا لزيارتك

    ReplyDelete
  24. بوست حلو جدا جدا جدا جدا جداااااااااااااااااااااااااااااااانن

    ReplyDelete