Tuesday, May 19, 2009

حفيد الرئيس


محمد علاء ... محمد ممدوح


ردود الأفعال على وفاة حفيد الرئيس جعلتني أستحضر تدوينة كتبتها سابقاً بعنوان عندما يموت الرئيس أنهيتها بأننا شعب عاطفي ، ومنها ظهرت اليوم بعض التدوينات ورسائل الحالات على الفيس بوك والتعليقات على الخبر في المواقع الإخبارية تحمل كثير من التعاطف ، ولكن لأن الموت دائما صادم وله قدسيته تتعطل فيه مراكز التفكير والذاكرة وتنشط فجأة مراكز العاطفة ليكون لها التأثير الأكبر ، بعد تعطل مراكز التفكير كان التأثر وواجب العزاء هو سيد الموقف

أما بعد

جنازة عسكرية ويلف الجثمان بعلم مصر لماذا ؟ تعلن القنوات الرسمية وبعض القنوات الخاصة الحداد على وفاة حفيد الرئيس لمدة ثلاثة أيام ... هذا كثير ، نحن لسنا في دولة ملكية وحفيد الرئيس هو شخص عادي مثله مثل أي مواطن في هذا البلد ، نشاطر الرئيس أحزانه واجب لكن أن يتعطل الجهاز الإعلامي الرئيسي للدولة حداداً ثلاثة أيام هذا ليس عادي ، هل يعلم المسئولين كم من آلاف الجنيهات تتكلفها دقيقة الإرسال الواحدة من جيوبنا حتى يتم إتخاذ هكذا قرار

يقول شكري مناع على الفيس بوك تعليقاً على خبر حداد التلفزيون الرسمي


العبارة كانت بتغرق وكاونوا في المدرجات بيشجعوا المنتخب ، قطار الصعيد ولع ومحدش قال حاجة ولا حد إتحاكم ، بلد بقالها 30 سنة في قمع وجوع وفقر وغلا وبلا ، ومحدش عزانا في حالنا

أنا أدري لماذا تذكرت محمد ممدوح طفل شها البالغ من العمر إثنى عشر عاماً الذي أخذته الشرطة من منزله سليم معاف ، لتعيده لأمه بعد ذلك جثة هامدة وأثار الحروق والجروح والتعذيب يدمع لها القلب قبل العين ، ولم يتحرك ساكن ، أدري أني تذكرت ذلك لما تركته في نفسي تلك الحادثة البشعة والجبانة من ألام وأحزان عشتها لمدة أيام طوال تلازمني فيها صورته
وما تذكرته لحقني به جيمي هوود في تدوينته كل الناس دى بتقولك .. البقية فى حياتك يا ريس عيالك مش أجدع من عيالنا

وصلتني تواً رسالة من زوجتي على المحمول وأنا أكتب هذه التدوينة تقول لي فيها بالحرف الواحد بدون أي سلامات ولا تحيات " تصدق .. الريس صعبان عليا بالرغم من كل حاجة " مش عارف أقول غير عزائي لوالدة الشاب الفقيد محمد علاء فليس هناك شيئ أصعب من فقد الأم لإبنها في هذا العمر

25 comments:

  1. ام بقلبها قالت لك الرد اهي اعتقد هي دي المشكله الوحيده كونهم عملوا كده فده علشان بس مجاملات وحب ظهور
    ردي اللى ممكن ميعجبش ناس كتير
    واحنا كنا فينا والناس غرقت واتحرقت كنا بنرقص برضه فى الشارع يعنى مش كلنا حسينا على دمنا
    مش كلنا اتوجعنا
    يبقى المفروض نحاسب نفسنا
    انا بتالم لما بشوف طفل فى الشارع وبتوجع اتوجعت لكل الاطفال بصرف النظر عن كونهم مين وولاد مين

    ReplyDelete
  2. اللة يرحمة وربنا يصبر اهلة, مهما كانوا دايقونا بس مش من سنات المسلم الشماتة باخية, اللة يرحمة ويجعلة طريق لاهلة للدخول الجنة

    ReplyDelete
  3. النفاق لاحدود له يا عزيزى

    مصاب فادح الحقيقه سواء اصاب اطغى الطغاه او اضعف الضعفاء وطبيعى ان لا يشعر القوى بهذه المصيبه عندما تلم بالضعيف وطبيعى ان يشمت الضعيف عندما تلم هذه المصيبه بالقوى

    أما أسلامى فقد جاء لينقى مشاعرى قوياً لأشعر بمصاب الضعيف وارق له أو ضعيفاً حتى لا اشمت فى مصاب القوى واواسيه وعندما المت المصائب بضعفاء هذا الوطن كان هذا امتحان الله لقويه الذى اظن انه رسب فيه والأن عندما المت المصيبه بقوى هذا الوطن اصبح هذا امتحان الله لضعفائه والذى لا ينبغى لنا ان نرسب فيه

    عزيزى ابن الرئيس وحرمه وسيدى الرئيس وحرمه وكل اسرتكم . . اتوجه اليكم بقلب خالى من النفاق ووجدان منقى من الشماته لأواسيكم واعذيكم وادعوا الله لكم الا يريكم مكروه اخر فى عزيز لديكم أملاً فيما امل فيه امام الدعاه يوماً بان تكون هذه الهزه خطوه على طريق الحكم الراشد وسبيل لدخولكم الجنه

    البقاء لله

    ReplyDelete
  4. عارف
    النهاردة شفت ناس كتير قوي زعلانين
    طفل بريء و مالوش ذنب
    لكن زي مايكون حصل للناس رجة

    قصر رئاسي و مستشفى فرنساوي و دكاترة من كل أنحاء العالم

    لكن لا راد لقضاء الله

    الناس زي مايكونوا إتخضوا ..كانوا ناسيين إن الموت مالوش كبير مثلا

    برضه الموضوع صعب قوي ..لما يبأه الواحد عنده قوة و سلطان ..لكن يقف عاجز في موقف زي ده

    ضربة بجد ممكن تكسر

    ربنا يصبر أهله و يمنحهم السلوان

    ReplyDelete
  5. جايز يكون هذا الطفل شفيع لاهله عن بعض ذنوبهم و اراد الله ان يستخلصه من بينهم لخير اراده له خاصة من دون اهله
    البقاء لله وحده

    ReplyDelete
  6. شفت فيلم
    the queen ?

    جنازة ديانا برضه كانت ضد القواعد لكن الحدث الجلل اللي ماحدش متوقعة دلوقت و اللي بجد بيهز الرأي العام
    لازم يبأه التعامل معاه مختلف

    أصلها غير متوقعه

    اللي كان متوقع كان متوقع الجد مش الحفيد

    ربنا يصبرهم

    ReplyDelete
  7. الا الموت و حرقة قلب الام و الاب علي ضناهم .. سيبك من شوية النفاق الاعلامي و الحركات .. بس بجد انا كأم فعلا قلبي بيتعصر عليه زية زي كل اطفال العالم الابرياء اللي مالهمش لا ف الطور ولا ف الطحين .. ربنا ما يسو حد ابدا ف ضنه .. امين

    اللي غايظني بقي .. انهم ممكن يدخلوا لجنة و ربنا يغفرلهم علشان مصابهم ف الواد ده !!!

    ReplyDelete
  8. ماعجبنيش تناول الكثير من المدونين للحدث

    ليه الشماتة دي كلها؟

    مش ده وقت الحساب يا صديقي
    بعدين

    أكيد مش النهاردة

    النهاردة وقت مواساة و دعاء

    مش كده

    ReplyDelete
  9. حسنا فعلت أن تذكرت طفل شها و ذكرت به .. لأن الشيئ بالشيئ يذكر .. و ليس طفل أعز من آخر و إن كان الأول حفيد فرعون مصر و الثانى يتيم تمتهن أمه سؤال الناس ..

    لا شماتة فى الموت و لكن فقدان الأبناء لا يغفر للمرء ما تقدم من ذنبه خاصة إن كان من ذنوبه ما يدب فوق الأرض و منها ما إن كان الثرى قد ضمه فإنه لم يواريه..

    أطلبوا الرحمة لمن مات و أطلبوها أيضا للموتى الأحياء فهم أمس حاجة إليها..

    ReplyDelete
  10. المشكله أنّنا مصرّون على إنّنا زىّ الفلّ ..
    و أن المشكله مش فينا زى ما هى فى حكّامنا .. إحنا كويّسين و طيّبين و أحسن شعب فى الدنيا لدرجة أن الله حين يريد أن ينتقم لنا ممّن ظلمونا سيكون هذا فى شخص الطفل البرئ و أمّه و أبيه الذين لم يؤذونا بشكل مباشر .. ده غير إنّنا إحنا نفسنا ماعملناش أى شئ لرفع هذا الظلم عنّا و اكتفينا بمصمصة الشفايف و الدعاء على الظالمين أن يأخذهم الله أخذ عزيز مقتدر


    أحد الزملاء فى العمل اليوم حين رآنى متأثّره بشدّه بسبب وفاة الطفل البرئ فوجئت به يقول لى : أخيرا الموت افتكر البيت ده كان تايه عنهم فين !! حاجه كده بتقرّبه من الكُفر و العياذ بالله كأن الله كان ناسى هذه الأسره و حين تذكّرها لم يختر سوى هذا الطفل البرئ !!


    يعنى أمّا أسره عاديه يموت لها طفل فهذا ابتلاء و مصاب أليم و اختبار من الله لهذه الأسره كى يمحو عنها ذنوبها و كى يكون لأبيه و أمّه من يأخذ بأياديهم للجنّه لكن لو مات حفيد الرئيس فهذا من سوء عمل الأسره التى ينتمى إليها و إيّاكش يتّعظوا .. و المفتى أمّا صرّح أن من ماتوا غرقى فى محاوله غير شرعيه للهجره ليسوا شهداء الناس هاجت و ماجت و غضبت وقالوا على الأقل يراعى مشاعر الأسر المكلومه .. لكنّهم منحوا نفسهم نفس الصلاحيات و بدئوا يفتون فى سبب وفاة الطفل و الحكمه الإلهيه من ورائه دون مراعاه لمشاعر جريحه زى ما طلبوا من المفتى مراعاة مشاعر أسر الغرقى من قبل !!


    أى حد عنده طفل .. سواء أب أو أم .. خال أو عمّ .. جد أو جدّه سيشعر بالقدر الهائل من اللوعه الذى لابد يعتصر قلوب أسرة "مبارك" مهما كانت سوابقهم معانا .. رؤية ابتسامة الطفل البرئ و تخيّل الآمال التى كان يحملها له أبواه و الذكريات التى ربطت بينهم شئ يعصر القلب حقّا .. و هو نفس الموقف من وفاة أى طفل لأى أسره كل ما هنالك أن هذه أسره شهيره شاهدنا تفاصيل حزنها عن قرب ولم يتسنّ لنا المثل مع كثير جدّا من الأسر المصريه التى تصاب نفس المصاب الأليم و حزننا اليوم لا يعنى بالضروره أنّنا لم نحزن بالمثل على من ماتوا أو لن نحزن على من قد يتوفاهم الله فى المستقبل .. مفيش علاقه بين هذا و ذاك .. بل أظن أن من يحزن اليوم على "محمد" سيجد دوما فى قلبه مكانا للحزن و الأسى على من قد يلقون نفس مصيره حتى و إن كانوا أقل شهره .. لا حول ولا قوّة إلاّ بالله

    ReplyDelete
  11. شر البلية ما يضحك فعلا
    كل مدون مستخبى وراء جهاز كمبيوتر
    ويقول لا شماته فى الموت وبعدها قائمة خطايا قديمة كده على الماشى للراجل العجوز المفجوع فى اعز ولده

    لا الله الاالله
    انا قولت الكلام ده قبل كده عند كل واحد كتب بقسوة عن الموقف

    وقت الموت نقول البقاء لله ونسكت
    الموت له حرمه
    والحزن له حرمه

    ووقت الموت مش ممكن يكون وقت تصفية الحساب
    ارحمو امه لما تقرا اللى انت بتكتبوا ده هيموت ابنها الف مرة

    لا الله الا الله سيدنا محمد رسول الله

    ReplyDelete
  12. طيب انا هسألك سؤال انا وانت وكلنا عارفين اجابته..

    تفتكر الريس طلب من التليفزيون الحكومى ده؟؟؟؟؟؟ تفتكر الريس طلب من كل القنوات الخاصه ده؟؟؟؟؟؟؟؟

    وايه التعليقات العجيبه دى

    (لكن لو مات حفيد الرئيس فهذا من سوء عمل الأسره التى ينتمى إليها و إيّاكش يتّعظو

    ليه كنت ربنا وعارف؟؟؟؟؟ مين اللى قال انه من سوء عمله ربنا قال ولا تزر وازره وزر اخرى

    ربنا اعدل وارحم علشان ياخد طفل برئ بأى ذمب الرسول نفسه قال ان اعظم ابتلاء هو فقد الابن وقال كمان ان ربنا نفسه بيسأل كيف كان عبدى ورده....

    مقلش لا ريس ولا غفير...

    بجد والله حرام ليه كله داخل يقول ولادنا بيموتوا والخ
    ليه متقولش ربنا يصبره انت متعرفش يعنى ايه اعز الولد ولد الولد واعتبره مش ريس اعتبره جد ...جد فقد اول ماشافت عينه والبكرى..

    انا سمعت انهاردا واحد من اللى حضروا الجنازه قال ان الريس راح المستشفى ودعه وشافه لاخر مره وقال انه مش هيقدر ياخد العزا ولا يحضر الجنازه....

    احنا نختلف وننتقد الريس ايوه لكن الا الموت والشماته فى الموت ,,,
    الموت مش بعيد عنى وعنك

    تصدقوا انا اكتر حد كنت بنتقد الريس والله لكن بعد الكلام ده واللى شوفته بجد بجد

    صعبان عليا ياريس صعبان عليا الجد المكلوم فى حفيده ولما يحس ان الناس فرحانه فيه ...

    لاحول ولا قوه الا بالله

    ReplyDelete
  13. "قائمة خطايا قديمة"
    استغفر الله العظيم
    الراجل العجوز المفجوع ده بيفجع كل يوم ألف راجل تانى
    محدش بيشمت فى الموت
    لكن فعلا
    الطفل اللى مات ده أهم من آلاف الأطفال اللى ماتوا قبله وبسبب جده ليه

    ReplyDelete
  14. ربنا قبض روح حفيده عشان اللى عمله فى الاقباط

    ReplyDelete
  15. يا زميل يا اللىّ مستنّى حكومه تشكم الشعب

    يا ريت تقرأ تعليقى بشكل أفضل كى تفهم ما أردت الوصول إليه لأنّك فهمت كلامى بشكل معكوس تماما .. شوية تركيز لن تضرّ و العمليه مش مستحمله مزايدات الله يكرمك ..

    ReplyDelete
  16. فى الموقف ده افتكرت حوار مسرحية الزعيم لعادل إمام لما قالوله: الرئيس مات .. رد قال: ريس مين اللى مات .. هو الريس بيموت زيينا كدة؟؟؟


    إنا لله وإنا إليه راجعون

    ReplyDelete
  17. الأخ
    bastawisi

    سمعنا السلام عليكم يا أخويا مش ناقصينك

    ReplyDelete
  18. والله يا احمد موش ذنب حسني مبارك أن عنده إعلام غبي قعد مداري على الخبر لحد ما اعلنته الدنيا كلها،وبعدين لما الناس أبتدت تتساءل ايه الموضوع وليه مكتمين على الخبر جم يكحلوا الدنيا عموها، بس أنا عايزه اقول لك موش كل القنوات لغت إرسالها وبثت قرآن كريم لأني شفت كذا مسلسل على بانوراما دراما، وشفت كذا برنامج على الفضائية المصريه، وإذا كانت القنوات الخاصة عايزه تجامل الرئيس في وفاة حفيده فأعتقد أن ده من مالهم الخاص وموش حايكلفوا الشعب المصري حاجه، أما حكاية العلم لو جه صاحبك حبيبك أيمن نور رئيس للدوله وحدث لاقدر الله لأحد من أ حفاده كده حايعمل أكتر من كده ساعتها برضه حاتنتقده واللي حاتقول أيه؟؟؟؟؟؟؟؟؟؟؟؟
    طبعا حاتقول زعيم وابن حفيد الزعيم لأنك بتحبه،ماهو المثل بيقول حبيبك يبلع لك الزلط وعدوك يتمنى لك الغلط

    وبعدين العلم رمز لكل مصري، وممكن تنادي من خلال مدونتك أن كل مصري يموت يلفوا نعشه في علم، وحتى لو مانديتش ممكن أي حد يعمل اي حاجه في مصر ،ومحدش حايحاسبه

    أما أنا مراتك تقول صعبان عليه حسني مبارك فهي بجد أمرأة حنونه وطيبه وذات مشاعر وخلقها الله سبحانه وتعالى أمرأة رحيمة بالبشر في ضعفهم حتى ولو كانوا أعداءها وأعتقد أن هذا حال كل المصريين الذين حزنوا على خبر مأسوى لحفيد رئيس دولتهم،

    وهي أم وتعلم جيدا ماذا تعني حرقة قلب الأم



    وبعدين يلفوه في علم يعملوا عليه حداد 3 ايام، عادي هو ليس شخصا عاديا ولكنه حفيد الرئيس


    رحمه الله ورحم جميع موتانا





    وكل واحد معلق بشماته وتشفي هنا أو في أي موقع اقول له عقبال عندك علشان تدوق حرقة القلب


    وبعدين أحنا مابيعجبناش العجب ولا الصيام في رجب ، ولن نرض على اي رئيس ابدا إلا بعد مايموت

    ReplyDelete
  19. بس عايزه اضيف لك مقولة لواحد أماراتي قال لي أنتم شعب موش عارف قيمة رئيسه،وكل رئيس جه لمصر جه في وقته المناسب ، عبد الناصر جاء بثورة على الأنجليز والإقطاع والظلم،وكان مناسب لوقته، والسادات جه ومصر مهزومه وجاهد وحارب وحرر الأرض وعمل السلام، وحسني مبارك جه يكمل مسيرته ورجع لكم الأرض، وياما أستفذوره في حروب يحرك فيها جيوشه إلا أنه بيرفض التهور علشان عارف كويس ان مصر موش حمل حروب وأن اي حرب حاتقضي على مصر نهائيا



    ولو كان جمال عبد الناصر اللي بيحكم دلوقتي لكانت مصر زي العراق



    وسلم لي على أيمن نور


    وفتح المعابر

    ReplyDelete
  20. لا إله إلا الله..

    هوة يا إما ناس بتعتبر حفيد الرئيس قادم من كَوكَو تاني ، يا إما ناس بتشمت لمجرد الشماتة..

    لن نتغير..

    ReplyDelete
  21. السلام عليكم

    هو اللى حاصل ان فى جهات ومؤسسات بتجامل وعندها اغراض من ورا ده

    لكن اعتقد انه على مستوى المواطن العادى عندنا تعاطف كلنا مع حالة وفاة لطفل زى اى طفل وربنا يصبر اهله وزى ما عندنا تعاطف فعندنا خنقة من وقف المصالح والاحوال وخنقة من اللى بينافقوا

    وتقبل تحياتى

    ReplyDelete
  22. لا ارى فى التدوينه شماته
    رد الفعل الاعلامى غير مقبول بالمره و لا اظن ان قول هذا يحمل اى نوع من الشماته...مثل هذا السلوك هو الذى يكرس لتحولنا الى ملكيه باصرار غريب و من بعده التوريث

    و لا ارى فى رفض هذا السلوك عدم احترام للموت او ما شابه بالعكس كل الناس صعبان عليها الطفل و اهله

    ReplyDelete
  23. ادعوك لقراءة البوست الخاص بي ... حول الموضوع ... ولنتحدث بعدها
    http://elmohandes2010.blogspot.com/2009/05/blog-post_20.html

    ReplyDelete
  24. ربنا يرحمه و يصبرنا احنا

    ReplyDelete
  25. شكراااااااااااااااا علي المواضيع الرائعة
    وأرجو زيارة مدونتي علي الرابط التالي
    http://all2earning.blogspot.com

    ReplyDelete