Saturday, November 12, 2005


الوصايا الثماني الذهبية



يبدو أن أحد الشباب الذين أقدموا على الخطوبة مؤخرا وجد فى العبد لله ضالته المنشودة ، حيث رأى إننى حالة نادرة فى الحياة الزوجية نظرا لمرور أيام قليلة على الإحتفال باليوبيل الخشبي لزاوجى عشر سنوات يعنى ، طلب منى أن أسدى له بعض النصائح التي أراها الهامة لنجاح حياته الزوجيه
وضعت يدي على كتفه وقلت له شوف يابنى .. أنا هاديلك عصارة تجربتى فى الحياة الزوجية وإعمل إللى هاقولك عليه فى فترة الخطوبة والزواج .. جوازك يستمر وتعيش متهني وملك طول عمرك

أولا : لو ليك تجارب عاطفية قبل كده ، إوعى تحكى لخطيبتك عليها عشان تبين لها إنك واد حبيب والبنات بتموت فيك .. كل ده هايطلع على دماغك بعد الجواز وهايتعمل عليك حظر دولى من كل من ينتمى للجنس الناعم

ثانيا : لو إنت معجب بمغنية أو عارضة أزياء أو ممثلة أو رقاصة .. إحتفظ بالسر ده لنفسك عشان لو هي عرفت مثلا إنك أحد المتيمين بجمال نانسي عجرم ، هاتسببلها عقدة نفسية لأنها عمرها ماهاتكون شبهها وهاتحاول تعمل المستحيل عشان تبقى زيها عشان ترضى سعادتك وده معناه إن كل يوم هاتلاقيها طالعاك بشكل أغرب من اليوم اللى قابله وتسألك سؤال تقليدى بذمتك أنا أحلى ولاهى ؟ لغاية ماإنت تزهق وهى تزهق وتقوم شاتماك وتقولك بلا نيلة يعنى إنت اللى شبه هانى سلامة يعنى ؟وطبعا سيادتك زى مانت عارف فيك شبه كبير من سامى العدل ، وإحذر هيفاء وهبى لأنك فى الحالة دى هتلاقى مراتك كل يوم وهى راجعه من الشغل وراها عشرين واحد ماشي وراها وممكن اكون واحد منهم

ثالثا : مافيش داعى تحكى عن مواقفك الطريفة اللى حصلتلك قبل كده عشان ده مابيكونش طريف بالنسبة لها ولكن بيديها إنطباع إنك واحد أهبل وهايف وعبيط ، زى ماتحكيلها مثلا عن يوم ماكنت قاعد فى أحد الصالونات مع ناس محترمة وتكتشف وانت بتحط رجل على رجل أنك لابس شراب واحد ، أو مثلا لما ركبت التاكسي وإكتشفت إن ماكانش معاك فلوس والسواق هزأك ، او لما البوليس قفشك باليل وماكانش معاك بطاقة ونمت فى التخشيبة للصبح .. مافيش داعي يعنى هى مش هاتنسي الحاجات دى وهاتطلع وقت اللزوم

رابعا : إياك وأي تذكار زى منديل أو شريط كاسيت من صاحبتك السابقة إذا كان فيه ، لأنها إذا إكتشفت مثلا دبدوب أبو نص جنيه محتفظ فيه بدولابك فده معناه إنك هتلاقيه متقطع ومرمي فى الزبالة وهايكون ده مدخل لحاجات كتير تختفى من دولابك قد تصل إلى النقود ، حيث انها تدخل فى باب الهدايا التذكارية

خامسا : مافيش داعى إنها تعرف تفاصيل دخلك الشهرى حيث أن لديها إعتقاد خاص بأن أي جنيه زيادة فى دخلك الشهرى سوف يدفعك إلى الرذيلة ودرءا للمفاسد هاتحاول تجردك منه بكل الطرق المشروعة والغير مشروعة

سادسا : مافيش مانع أن تجاريها فى بعض هوايتها كالحديث بصوت مرتفع فى بعض الليالى القمرية أو إلتقاط بعض الفضلات الملتصق بسجادة غرفة المعيشة وإلتهامها أثناء مشاهدة التليفزيون ، أو السير بالمنزل طوال اليوم بشبشب فردة واحدة بس

سابعا : لاتحاول إخفاء أى معلومة عنها حتى ولو كانت تافهة فهى هاتعرف هاتعرف ولو لقيتها بتلعب فى الموبايل بتعاك سيبها لأن أى حركة منك هاتؤكد لها إنك عامل بلاوى مسيحة وعمال تترازل على بنات الناس لإحساسها الأبدى إنك إنسان ماعندكش دم

ثامنا : تجنب دائما الحديث مع الجنس الناعم أمامها ، يعنى مثلا لو إتصلت بيك البنت بتاعة الإيه أر تي أو الأوربت عشان الإشتراك قولها ، خدى المدام كلميها وممكن إنت تبقى تكلمها بعدين لو عايز تعرف معلومات أكتر عن المحطات التانية ، ولوجارتك خبطت الباب وفتحتلها الباب بص فى الأرض وإطلع إجرى إدخل جوه وناديلها وإختفى تماما حتى تنصرف الجارة وإكتفى بما تراه من جارتك عندما تقابلها على السلم منفردا

رفع الشاب يدى من على كتفه وقال لى والله أنا سعيد جدا بمعرفتك .. وياريت ماشوفش وشك تانى

--------------------------------------------------------------

تحديث 1

ملحوظه : قمت بنشر البوست اليوم لأول مرة فى منتدى بالعربي .. عشان لما تنتشر بعد شهر أو إتنين فى المنتديات .. تعرفوا إنها بتاعتي

--------------------------------------------------------------


تحديث 2



الحقي
قة تحت المطر --- قصة جديدة فى... نظارة شمس

--------------------------------------------------------------------------

تحديث 3

الفترة القادمة قبل بداية العام الجديد سوف تشهد عدة سفريات إلى الكويت والبحرين وقطر ، أولهم غدا صباحا الإثنين إلى الإمارات .. دبى/ الشارقة / أبوظبى .. رحلة عمل وراجع الجمعة إنشاء الله ، هاحاول أتابعكم من هناك ، ماحدش عايز حاجة من هناك ؟

29 comments:

  1. :)

    ههههههههه

    وأنا بدورى اوجه نصيحة واحدة للشابات اللى هتتخطب.. إتأكدى ان خطيبك مقراش نصايح أحمد العاطفى

    ReplyDelete
  2. جامدة يا باشا

    ReplyDelete
  3. ههههههههههههههههههههههههه

    تصدق نفس الرد جه في بالي

    المعلم مبسوط منك قوي وبيقولك مش عاوز يشوف وشك تاني

    خلاص يا بنات انتظروا مني :
    نصائح طعمة للزيجة الناعمة
    :P

    ReplyDelete
  4. :-))))

    عندي سؤال بسيط: هي المدام بتقرا مدونتك؟ حتّى نطّمن إنّك حتروّح بيتك الليلة :p

    ReplyDelete
  5. walla ya eve i ask myself that question all the time too, tell us ya basha, il madam shoo ra2iyha bilmaktoob?
    :)))

    ReplyDelete
  6. روعة يا ابو حميد..النصيحة التاسعة حط password
    للكمبيوتر بتاعك لحسن الفاس تيجي في الراس وتبقي مذبحة ولا مذبحة القلعة
    :))))

    ReplyDelete
  7. أنا متأكد إن مفيش حد بيأكلها بالساهل . فاكر البوست بتاع المقطم أعتقد إنه "حدث بالفعل" :))

    ReplyDelete
  8. ثالثا>>>> جميييييلة خالص


    بس سابعا>>> عايزة شرح اشمعنه يعني اللي قلتهم بالذات؟؟؟

    اعترف يا أحمد
    :P


    اما ثامنا فهي حقيقه حقيقه

    محدش يحاول يصحي الفضول في حواء

    دي حتبئا مشااااااكل



    يلا عاوزين نصائح نسائية
    ..
    :)

    ReplyDelete
  9. ايه النصايح المنيلة دي فطستني :)

    هي مراتك عارفة انك عامل مدونة ؟

    ReplyDelete
  10. الحمدلله ان جوزي مبيعرفش مدونتك كنت بفكر اعرفه عليك بس بطلت

    ReplyDelete
  11. يا جماعة أنا سبق وان سألته نفس السؤال
    و قال ان المدام و لاتعرف اصلا انو عنده مدونة

    انا منتظرة نصائحك يا طعمة

    استاذ احمد
    تعرف ؟كل النصائح واقعية عدا المشي بشبشب فردة واحدة و لم الاشياء اللي ع السجادة
    رهيبة

    ReplyDelete
  12. تروح وترجع بألف سلامة يا أحمد
    ماتنساش تجيبلي معاك علبة شكولاتة ماكينتوش كواليتي ستريت :)

    ReplyDelete
  13. الراجل فعلاً عنده حق أحنا حنتجوز ولا حنحارب ياراجل بلا هم الحمد لله ان احنا عواطليه
    وبعدين يا حبيبى من غير ما تنشر فى اى منتدى الحاجات كده كده بتتسرق يا راجل دى الجرايد كمان بتسرق مش المنتديات

    ReplyDelete
  14. انا معاك ف اللي قلته بالاخص انك تماشيها في هواياتها .. بس ما تحكيلهاش علي الماضي ......ممممممممممممممم ... متهيألي ما افضلش كده .. بس لو هي ما عرفتش فخلاص كويس كده .. بس لو عرفت من حد غيرك هتسقط من نظرها و عمرها ما هتامنلك تاني .. الافضل انك تقولها كل حاجه و تديها احساس بالثقه مع الوقت .. و الله اعلم

    ReplyDelete
  15. يااااه انت جاي عندنا
    يا اهلا وسهلا
    نتمى انك تقضي وقت ممتع عندنا في الكويت خصوصا ان الجو هايل الايام دي :)
    ولو كنت عاوز معلومات او اي حاجة ابقى قولي :)

    ReplyDelete
  16. انت تنفع استاذ ايتيكيت انا باقترح عليك تعمل دوره فى الموضوع ده و بما انى المقترح فالمكسب يبقى بالنص و المفروض بدل احمد العاطفى تبقى احمد الواقعى
    و الواحد ممكن يكون عامل مدونه و مراته ماهيش عاتقاه و عامله هى كمان مدونه و بترد عليه او تجاريه و راصده جميع تحركاته من بعيد لبعيد

    ReplyDelete
  17. لووووووووووووول

    ابصملك بالعشرة النصايح دي كلها حصلت لك لووووووووووول

    وتروح وترجع بالسلامة ان شاء الله....:)

    وحتنور الكويت والله...:)

    ReplyDelete
  18. و انا اللي كنت بقول عليك رومانسي و عاطفي بعد تعليقك في بلوجي...

    حرام عليك يا شيخ صدمتني فيك ..المشاركه في الهوايات جميله بس حكاية فرده الشبشب و الاكل من على السجاده دي صعبه قوي

    بس انه ميقولهاش على الماضي دي متهيالي كده صح قوي

    ReplyDelete
  19. الله يسامحك يا احمد
    مقلتش الكلام ده ليه من بدري
    :-)
    ترجع بالسلامة وابقي احكلنا اللي حصل

    ReplyDelete
  20. ما شاء الله عليك أبو حميد
    فاهمها وهيا طايره :)
    تسلم والله نصايح وافيه الله يعطيك العافيه
    بس وين المتزوجين ؟؟
    :)

    تحياتي وتقديري

    ReplyDelete
  21. :))) بوست تحفة...بس انت لازم تدي كورسات بجد :)
    تروح و ترجع بالسلامة ان شاء الله...

    ReplyDelete
  22. تصدق انا شايل فكرة الجواز من دماغي

    وعايز اعيش كأني تعلوب متدلع..ااه متلوع

    بس بعد النصايح الجامدة كييك انا شايف ان الرؤية بدأت تبان ملامح حلوة والموضوع مش هيبقى وحش

    ReplyDelete
  23. This comment has been removed by a blog administrator.

    ReplyDelete
  24. حتنور الكويت يا أحمد

    عاد الجوو حلوو وايد


    وايد = أوي

    ReplyDelete
  25. اعملهم كتاب وسميه النصائح اللولبيه للسعاده الزوجيه

    ReplyDelete
  26. المشكلة يا ابو حميد ان جوزى اسمه احمد
    واحتفلنا بعيدنا الخشبى قريب

    مصيبة لتطلع هوة

    مصيبة بجد

    اسم مامتك ايه

    ترجع بالسلامة

    عايزة جالاكسى

    على قد ماتقدر

    ReplyDelete
  27. و ليه المدام مش عارفة إن ليك مدونة؟

    ReplyDelete
  28. la brize
    هاها .. فكرة والله أحمد العاطفي

    bent masreya
    ماأعتقدش النصايح دى تنبع من واحد عاطفى خالص

    mohamed eldesoky
    المهم تجيب نتيجة

    طعمة
    بلغنى أن نصائح طعمة للزيجة الناعمة مكسرة الدنيا

    eve
    والله يإيف سؤال وجيه جدا .. بس طالما إنى لسه باكتب ده معناه إنها لسه ماتعرفش

    khalid jarrar
    حتى الآن رأي المدام مش واضح وماعتقدش إنه هايكون جيد

    sonofegypt
    شكرا على مشاعرك النبيلة .. بس الموضوع مش محتاج باسوورد عشان الكومبيوتر مش فى البيت أساسا

    أحمد فوزى
    ده من زوقك .. بالمناسبة هو ليه كتب إيه

    مهاجر
    ده إنت قلبك جامد أوى .. إنت لسه فاكر موضوع المقطم

    نون النساء
    نمرة سبعة .. يعنى لو هى مسكت الموبايل ماتحاولش تجرى وتاخده منها عشان ده هايأكدلها إن فيه حاجة لأنها ممكن تمسكه من غير ماتكتشف اللى جواه ولو إكتشفت حاجة ممكن تعرف تتصرف لكن محاولة عدم تركها تعبث بالموبايل هايأكد لها اى شكوك حتى لو ماكانتش موجوده .. قشطة ؟

    mindonna
    شدى حيلك إنتى وإنوي الجواز وخللى النصايح على أنا

    chatterbox
    كده برده .. عموما صعب جدا تطبيق النصايح دى للمتجوزين عشان خلاص .. كل شيئ إنكشف وبان

    tara
    فعلا كويس إنك فاكرة الإجابة .. يمكن خانى التعبير فى النصيحة السادسة وبدل ماأقول يجاريها أو يشاركها هوايتها كان المفروض تكون يتجاهل التعليق على بعض هوايتها

    طعمة
    فعلا .. الماكنتوش جه .. بس مافاضلش إلا شوية صغيرين .. فيه جواهر تنفع؟

    shady
    يعنى عايزهم عواطلية شغل وعواطليه جواز كمان
    حلوة الجرايد كمان بتسرق دى

    lost in the life
    كويس اوى إنك إستفدت ياحسام .. أهم حاجة التطبيق وأنا معاك على الخط أى حاجة كومنت صغير وتلاقى الحل

    romantic rose
    دى بالذات فعلا وعن تجربة ومش تهريج أهم نقطة .. مش لازم كل حاجة فى الماضى تتحكي خصوصا إن الماضى مش هايمها كتير زى الحاضر

    chatterbox
    ميرسي ياشاتر .. غالبا الإسبوع الجاى هاكون فى الكويت .. عرفت إن فيه أمطار اليومين دوول

    islam yousef
    و الواحد ممكن يكون عامل مدونه و مراته ماهيش عاتقاه و عامله هى كمان مدونه و بترد عليه او تجاريه و راصده جميع تحركاته من بعيد لبعيد

    إنت هاتقلقنى ليه ؟؟
    إنت عايزنى أدى دورات ؟؟ لعلمك فكرة وبالنص مافيش مشاكل

    q8tya
    الكويت منورة بأهلها
    هى حصلت بس مش بالظبط أوى

    bosbos
    و انا اللي كنت بقول عليك رومانسي و عاطفي

    ماأول تعليق أهوه بيقول إنى أحمد العاطفي
    عموما رأيك الأول هوه اللى فى محله .. وأنا متفق معاكى تماما فى موضوع الماضى القديم مش لازم يتقال


    Y.mejahd
    هى الفاس خلاص وقعت فى الراس .. إنسى ياعمر
    الحمد لله انا رجعت بالسلامة وجزء صغير من اللى حصل كتبته فى البوست التالى

    slim thug
    إوع تنسى بس النصائح دى فى بداية الجواز وإنت هاتدعيلي العمر كله

    nerro
    كورسات مرة واحدة .. إنتو عايزين تزودوا عدد المطلقين ولا إيه؟
    الله يسلمك يانيرو

    foxology
    الموضوع ياتعلوب شيق جدا .. وخصوصا لما إنت تكون جواه .. فعلا هاتكون كييك

    نون النساء
    الكويت منورة بيكوا يانون
    .. بس أنا شايف الغيوم جامدة عندكوا ومطر وحاجات كده

    Az
    كتاب إسمه النصائح اللولبيه للسعاده
    الزوجيه

    الخوف بس الإسم يتفهم غلط ويفتكروه عن تحديد النسل

    حلم
    إنتى هاتقلقيني ليه ، هوه اللى بنعمله فى الناس هايطلع علينا ولا إيه؟

    eman m
    إيمان .. من زمان وأنا باقول عليكى ست العاقليين
    فى الآخر تسألينى ليه المدام ماتعرفش .. يعني كل البلاوى اللى كاتبها دى ومش كفاية

    ReplyDelete
  29. هاى مساء الفل

    ReplyDelete