Sunday, November 20, 2005


الإمارات .. رايح جاي



الطائرة -- هى الطيارة دى نوعها إيه ؟ ده السؤال اللى إبتدى جارى فى المقعد على الطائرة الحديث معى واللى منه إكتشفت إنه هايقعد يرغي معاي طول الرحلة ، يعنى إيه نوعها إيه ؟ أنا والله مابفهمش فى الطايرات البوينج من الإير باص كله زى بعضه ، هى هاتفرق معاك إيه ؟ ماردش على ولكن قاللى أعتقد إنها جامبو !! ، وعلشان أنهى الحوار معه للأبد قبل ماتبدأ الرحلة قلت له : جامبو .. لأ جامبو إيه !! الجامبو دى بتبقى دورين زى أتوبيس لندن كده ... نظر لى نظرة كانت كفيلة بأنه لاجدوى من حوار مع واحد ماعندوش فكرة عن حاجة وبيفتى كمان.

الجوازات -- خلصت إجراءات الدخول فى دبي فى أقل من خمس دقايق بالرغم من وجود أكثر من رحلة فى نفس الوقت ، وإبتسامة على وجه فتاة الجوازات الإماراتية وهي بتدينى الباسبور وبتقولى هلا بيك ياشيخ ... إفتكرت الرائد صبحي فى مطار القاهرة وهو بيقولي بقرف كأني مسافر على حسابه .. فين تصريح السفر ؟ يقصد تصريح الجيش .. أصل العبد لله ولامؤاخذه بعد أن بلغت من العمر أرذله لسه على قوة الإحتياط

المصري -- خارج المطار الفهلوة المصري إشتغلت .. لقيت واحد قرب مني وقالي بصوت واطى : تاكسي .. عرفت إنه مصري ومن طريقه كلامه عرفت إنه بيعمل عمل غير مشروع يعاقب عليه القانون .. سألته عن السعر لوسط دبى قاللى أربعين درهم .. بصراحة أنا كنت عايز أستمتع بوقتى وهربان من فهلوة المصريين ، عشان كده رفضت وأخدت ليموزين كان موديلها فورد مونديو .. حاجة محترمة وطلع الحساب فى الآخر ثلاثة وثلاثين درهم وإداني الباقي



دبي -- مدينة حيوية شبابية حديثه ملتى ناشيونال .. جميع الجنسيات موجودة .. تحس إن الناس مش فاضية الحركة سريعة والوقت له ثمن وكله بيشتغل وكله عارف بيعمل إيه

شقاوة .. شارع الرقة


من داخل الكوفى شوب


كله بيتكلم هندى .. الشارع .. العمل .. الراديو .. وحتى الإعلانات


الشوارع أسماؤها غريبة صعبة النطق .. القرهود .. الخوارينج .. المرقبات .. الغبيبة

دمشق .. بيروت.. دايما جنب بعض حتى فى دبي



الفول ... مطاعم جــاد وراك وراك ... حتى فى دبي




هاها .. أتوبيس النقل العام عندهم


مطار دبى / جزء من المطار
العودة -- أخبرتني المضيفة الأرضية بمطار دبي أن الرحلة تأخرت لمدة ساعة ونصف وطبعا كان المستفيد الوحيد فى هذا الموضوع هو السوق الحرة التى فيما يبدوا وجدت ضالتها فى العبد لله .. ووجدتنى لقمة سائغة وأعتقد أنهم سوف يغلقوا السوق الحرة بمطار دبي مكتفيين بما حققوه من مبيعات معي .. لم ينقذني من شراء الموبايل أبو ثلاثة وخمسون ألف جنيها سوى إعلان المضيفة عن ضرورة التوجه للطائرة فورا

24 comments:

  1. سؤال لو سمحت يا باشا...
    هو الموبايل اللي ب 9000 دولار بيطبخ؟
    بحل المشاكل الزوجية؟
    بغنيك عن الوصايا الذهبيه او بذكرك فيها على الاقل؟
    9000 دولار؟؟
    حرام عليك يا اخي!

    ReplyDelete
  2. انتة رحت وجيت بسرعة
    كنت اريد اوصيك على شي تعملي اياه لما تروح لدبي

    الحمد لله على سلامتك

    ReplyDelete
  3. كتابة جميلة

    أجمل صورة و تعليق تبع دمشق و بيروت

    بس شو هاد اللي سعروا تقريبا 10000 دولار يعني نص مليون ليرة سورية

    حق بيت و سيارة عندنا

    ReplyDelete
  4. انا سمعت كتير قوي عن فهلوة المصريين بس مكنتش اتخيل ان المصريين نفسهم بيتكلموا عن الموضوع ده:) ( مع الاعتذار)

    اما بالنسبة لدبي فهي فعلا مدينة بتشتغل
    من عامل الزباله لحد رئيس الدولة ( مع الاعتذار لعامل الزبالة)

    اما بالنسبة للمصيبة اللي كنت ناوي تعملها فربنا بيحبك وانقذك منها
    المبلغ ده يعني 3000 دينار عندنا وده يعتبر مقدم سيارة مرسيدس
    صغيرة او ثمن سيارة ياباني كاملة. ربنا ستر الحمدلله :)
    واخيرا حياك في دبي دار الحي :)

    ReplyDelete
  5. أبو حميد
    الحمد لله على سلامتك يا باشا
    ما جيتش مضيت حضور ليه فى المدونه عندى لما رجعت من السفر
    هههههههههههههههههههه
    مستنى رأيك
    KING TOOOT

    ReplyDelete
  6. ألف حمد الله على السلامة يا أبو حميد :)

    فين علبة الشيكولاتة ؟

    ReplyDelete
  7. 6i3ma you a43 so damn right.
    where is the choclate ya a7med basha?
    :))
    khalid*

    ReplyDelete
  8. و إنت إيه اللي وداك هناك

    يا فلوسك يا أخي
    ده مش قر
    ده حسد
    :0)


    و برضه لسة ما بقالكش كتير راجع من عمرة تصور البنات
    و يا ريت عليهم الطلا
    إلا دول شبه البنات بتوع عصافرة قبلي
    طبعا الوحشين منهن
    يا أخي دا أنا معملتهاش ف سوريا نفسها تقوم إنت تعملها ف دبي
    :0(

    ReplyDelete
  9. حمد الله على السلامه...:)

    اما ابو جامبو دي حكايه هههههههه..

    خوش تصريفه ههههههه

    دبــي....رووووعه بشكل مو طبيعي...:)

    لما زرتها اول مره ظليت فاتحه بوقي كتييير هههههههه

    تحياتي...:)

    ReplyDelete
  10. حمدلله علي السلامة اولا ...ثانيا انا مع الاخ وش مكرمش يا راجل حرام عليك دي صور تفرجهلنا فين العري و فين الاباحية؟ ده كلام برضه
    :)

    ReplyDelete
  11. حمد الله علي سلامتك انت كمان...صورك تحفة...مش بحب رغي الطيارات خالص...غير لو حد أعرفه...دبي واضح انها جميلة...الرحلة الجاية بقي ان شاء الله...

    ReplyDelete
  12. دبي دار الحي

    حتى بنات دبي ما سلموا منكم
    :P

    الحمدلله على السلامه

    تدري حلمي وشو!!
    اتمنى اني اشتغل في دبي
    لحالي .. يعني ما معي احد ابدا ابدا
    ولا اعرف احد في دبي

    عشان ابدا من الصفر

    بس طبعا حلم بنت سعوديه
    :P

    ReplyDelete
  13. و الموبايل ده بيطير ولا ببيض مثلا ؟

    ReplyDelete
  14. ابو حميد
    الحمد لله على سلامتك اخي

    البوست اللي راح كان عن وصايا وزواج ومنطق ..
    بس صورة البنات , ليش صورتهم يعني في سبب ولا فقط لوضع الصوره في المدونه ؟

    ههههههههه الجوال شكله سوبر مان

    دبي شي يجنن , افكر اعيش هناك :)

    ReplyDelete
  15. سيبك انت
    جاد منور دبى
    ده بقى سلسة عالميه باين عليه
    يعنى لو ربنا فرجها عليا ورحت دبى، آكل جاد دبى وأبطل جاد الحجاز اللى هرونا بيه فى الشغل
    :)))))))
    حمدالله عالسلامه

    ReplyDelete
  16. احمد

    حمدالله على السلاامه

    نورت مصر يا سي أحمد

    :P

    خووش رحله

    انا ما ضحكت الا على صورة الفلبينيات

    لاني متعقده منهم

    O_o

    ReplyDelete
  17. حمد لله على السلامة يا باشا
    تخيل انا الحاجة اللى حزت فى نفسى فى الموضوع كله موضوع تصريح الجيش ده
    هوه انت دفعه كام؟
    أخوك فى الاحتياط برده

    ReplyDelete
  18. alby etamen lama la2eet el foool fe dobai :)

    el wahed mesh 3ayez aktar men keda :D

    ReplyDelete
  19. أحمد باشا
    والله انا مش متابع من فترة لكن سفرياتك كترت يا بوب
    بس بالنسبة لتصريح الجيش ( الشر بره وبعيد ) انا عم واحد صحبى كان نفس حالتك كده واستدعوه للجيش لمدة اسبوعين تقربا ورجع يسب ويلعن على العموم حمد لله على السلامة

    ReplyDelete
  20. وحياتك حلاوه ناشفه ما فيها روح يا ابو حميد

    ReplyDelete
  21. khalid Jarrar
    الموبايل ده ياسيدي معمول بس عشان الناس تمصمص شفايفها وتتحسبن ، يعنى تقول حسبي الله ونعم الوكيل

    tara
    كنت عايزة إيه من هناك بس ؟ وبعدين ماأنا كنت قايل فى البوست اللى قبله
    ممكن أعرف .. جايز أعرف أتصرف

    cold0zero
    نورتينا ياسقراطس .. نفس الشيئ
    عندنا فى مصر ممكن تشترى بيه سيارة وتسكنى فى شقة إيجار جديد

    chatter box
    إنت هاتقوليلي على الفهلوة بتاعتنا .. ده إحنا مكويين منها .. كل الناس بتعرف فى كل حاجة وتفتى فى كل حاجة لغاية ماتودى الواحد فى ستين داهية .. بس طيبيين برده
    هاها .. أشترى إيه .. إنت عايزه مراتى تحجر عليا وتدخلنى مستشفى الأمراض العقلية

    King Toot
    تم التوقيع بالحضور ياجميل
    أى خدعة

    طعمة
    مش أنا جيبت الشيكولاتة الماكينتوش ب67 درهم يعنى ب 105 جنيه.. بس عقبال ماوصلت كان فاضل منها 3 حبات .. بس ممكن نملأ العلبة من عند قويدر

    وش مكرمش
    إنت اللى فتحت عليا موضوع البنات أهوه كله بعدك علق عليهم
    أنا كنت عايز أصور الشارع .. بس كان فاضى شوية ودول ظهروا رحت مصورهم وطبعا كنت بعيد .. زووم يعنى
    أما اللى ودانى .. الشغل طبعا

    q8tya
    الله يسلمك .. الراجل ده لوحده كان حكاية .. طبعا دبى روعة اكثر من روعة كمان

    sonofegypt
    يعنى إنت فى أمريكا.. وعايزنى أنا اللى أصور العري والإباحية ؟

    بفضفض
    الله يسلمك

    nerro
    دى حيلك .. دبي فعلا جميلة بس غالية جدا

    Se3loah
    تعرفى فعلا إن دبي بلد مناسبة ليكي جدا .. خصوصا إنك مثقفة وعندك دراية كويسة بالبيزنس على حد علمى فى موضوع البورصات والأسهم وكده

    مساعد
    الموبايل ده لابيبيض ولا بيطير ... ده يغيظ

    slim thug
    البنات دول مالهومش أى حكاية خالص .. اللى ليهم حكاية ماصورتهمش .. هاها ماكنتش فاضى

    lilli
    ده إنتى تبطلي جاد الحجاز وعباس العقاد والجيزة وبتوع إسكندرية كمان
    ده هناك كان فيه نجف كمان

    نون النساء
    هاها .. متعقدة من الفليبينيات ليه؟ هما فعلا كانوا كتيير أوى هناك ماليين البلد

    ملك
    تصريح الجيش هوه اللى لفت نظرك .. يادفعة
    عموما أنا ظابط إحتياط .. مش عارف إنت كنت ظابط برده ولا عسكرى؟
    أما رقم الدفعة فخليها على الميل

    Free soul
    لأ إطمئن .. شد حيللك إنت بس وروح هناك .. أنا أكلت طبق فول وطبق طعمية ب15 درهم يعن 22 جنيه
    بالشفا

    Taher
    ما أنا كنت فيه برده نفس المدة فى رمضان بتاع 2002 .. وبرده عملت زيه وأنا راجع

    Shady
    إنت بأه بالذات إفتكرتك وإفتكرت الحزب بتاعك هناك .. هناك مافيش حاجة إسمها عواطلي مافيش حد فاضى يهرش وكله بيجيب فلوس .. اللى بيجيبه الواحد فى مصر فى شهر بيجيبوه فى أقل من يوم

    تحياتى للجميع

    ReplyDelete
  22. ربيت في هذه المدينة وأقمت فيها لاكثر من نصف عمري وصدقني أحبها بجنون رغم انها كانت أقل سحرا من هذا .... لله الحمد :) وحمد الله على سلامتك وان كانت متأخرة يعني

    ReplyDelete
  23. مدوّنتك رائعة جدّاً... تحيّاتي
    ميس أبوصلاح

    ReplyDelete
  24. That's a great story. Waiting for more. »

    ReplyDelete