Monday, March 10, 2008

مصر في عيون الأمريكان


مصر في عيون الأمريكان

معهد جالوب قام بإستقصاء لطيف أوي الشهر اللي فات ، سأل ألف وسبعة أشخاص بالتليفون سواء المحمول أو الثابت ، عمرهم فوق التمنتاشر سنة عن الدول الملائمة لهم واللي بينظروا لها نظرة إيجابية والدول اللي مش بيحبوها ، وطبعا عشان الدول كتير إختاروا 22 دولة من مختلف دول العالم الدول دي منها فرنسا واليابان وإسرائيل وكندا وفلسطين وكوريا الجنوبية والهند والعراق وألمانيا والمكسيك وافغانستان وإيران والصين وكينيا وكوبا والسعودية وباكستان وروسيا وفنزويلا وكان بينهم مصر ، طبعاً اللي يهمني النتايج الخاصة بمصر وكانت كالآتي
حصلت مصر في إجمالي الإستقصاء على المركز الثامن من الدول الملائمة للأمريكان يعني ستة من كل عشرة أمريكان نظرتهم كانت إيجابية تجاه مصر قبل دول زي الصين وروسيا والسعودية والمكسيك وكوريا
الجمهوريين بيفضلوا مصر أكتر من الديمقراطيين وكمان الشباب حتى سن خمسة وتلاتين بيفضلوها أكتر من الأكبر من كده وكلما زاد السن قلما قل التفضيل
درجات التقدير كان بين موائمة جداً ، وموائمة جداً جداً ، وغير موائمة خالص وغير موائمة خالص خالص
نسبة 53 في المائة شافوا مصر موائمة جداً جداً في حين 9 في المائة قالوا موائمة جداً في حين 5 في المائة قالوا إنها غير موائمة خالص و21 في المائة شافوها غير موائمة خالص خالص


الإستقصاء طبعا مر علينا مرور الكرام وماحدش أخد باله منه بس الإسرائليين أخدوا بالهم منه ، صحيفة هاآرتز مافوتتش الموضوع ووقفت عند مايهمها وطبعا منهم مصر ، قال محللها يمكن إسرائيل ماكانتش أول دولة في القائمة زي ماهو متوقع بس هي برده في التوب فايف ، وهو شايف إن إسرائيل في تقدم بالمقارنة بإستقصاءات قبل كده ، ولكنه وقف عند دولتين يهموه الأولى فلسطين وإطمن لما وجد أنها قريبة من القاع لكن المفاجأة على حد كلامه كانت في ترتيب مصرحيث أن 26 في المائة من الأمريكان يتخذون منها موقف سلبياً بزيادة واحد في المائة بس عن إسرائيل ودي نتيجة هو شايفها مفاجئة جداً .. برده الناس دي بتعرف تقرأ الأرقام يعني مابصش على نسبة النتيجة الإيجابية وبس

عموماً تقدر تشوف النتايج كاملة وتكتشف مقارانات أخرى في
تقرير معهد جالوب

8 comments:

  1. إنت عندك نزيف تدويني حاد اليومين دول يا أحمد والا إيه؟
    ماشاء الله عليك بصراحة
    كدة مضطرين ندخل ع المدونة كل نص ساعة نشوف إيه الجديد
    GO ON..

    ReplyDelete
  2. لا استطيع النظر لهذه الأحصائات والأستقصائات الا بعين المؤامرة وحتى لو لم استطع استشفاف مؤامرة فى الموضوع مش معنى كده انه مفيش مؤامرة ، لالا خالص

    أنما يبقى انا اللى خايب ومعرفتش اكتشفها بس مش اكتر

    ايكد بيعرفوا يقرأوا الأرقام واحنا مبنعرفش بدليل ان ده حالنا وده حالهم

    ReplyDelete
  3. طب وفلسطين ليه في ذيل القائمة؟؟

    الاعلام الصهيوني مأثر للدرجة ديه وقلب الحقائق 180 درجة
    .

    ReplyDelete
  4. دي مصيبة
    مصيبة
    مصيبة فعلا

    يا نهار اسود ومنيل
    احنا؟ احنا؟

    انت عارف الاستقصاء ده حسسني بايه؟
    حسسني اني معفنة وبقالي شهر ما استحمتش وريحتي طالعة وانا مش واخدة بالي وفاكرة نفسي ان الناس مش شاماني وبعدين فوجئت لقيت واحد معدي من جنبي بيقول: اففففففف ريحة مجاري
    وطلعت انا

    اهو انا حاسة كده دلوقت
    للدرجة دي مصر قذرة؟

    ReplyDelete
  5. الشعب الامريكي العادي معلوماته عن مصر المعاصرة محدودة جدا جدا
    يعني هذه الاحصائية قائمة ليس على واقع كل بلد
    ولكن على معلومات الامريكان عن كل بلد
    والشباب الامريكي يحب مصر فقط لتاريخها
    هذه هي النقطة الوحيدة التي تجعل لمصر اي صورة ايجابية
    لان حاضرها ليس فيه اي شيء جيد
    من الاخر يعني
    !!

    ReplyDelete
  6. بوست جامد جدا
    ربنا يباركلك

    خالص تحياتي
    احمد

    ReplyDelete
  7. انا شايف ان ترتيبنا كويس !! و الموضوع مش مستحمل نحطه فى اطار نظرية المؤامرة

    ReplyDelete
  8. والله خير ان مصر ليها مكان لذيذ
    وهو على العموم سياسة مبارك إننا نحبب كل الناس فينا ونقيم علاقات مع كل الناس، ونقف جنب كل الناس، وماحدش يزعل مننا خالص

    على الرغم من إني أختلف معاه في بعض العلاقات دي، لكن صراحة هو نجح فعلا في إنه مش مخلي حد شايل مننا

    وأعتقد عشان كده الاعلام هناك محببهم فينا، احنا دولة صديقة وبنت حلال ومش بتاعت مشاكل

    ReplyDelete