ديمقراطية العجلة

وآآآآآه منك يا ... ديمقراطية

إمبارح جابوا خبر في الجزيرة عن ديفيد كاميرون ، وديفيد كاميرون ده المفروض إنه زعيم حزب المحافظين المعارض في إنجلترا، يعني زعيم المعارضة في مجلس العموم البريطاني يعني رئيس حكومة الظل ،الحقيقة كنت مشغول على النت فما كنتش مركز في الخبر لكني بصيت على الشاشة لقيت الراجل المحترم الكوبارة راكب عجلة وهما مصورينه ، قلت أكيد بيصوروه عشان دي حاجة عجيبة ، لكن بأه اتاري الحكاية غير كده ، الراجل صوروه وهو ماشي بالعجلة والإشارة حمرا ، وبعدين ماشي في شارع مزدوج ضيق رايح جاي مافيهوش جزيرة في النص بس فيه خط أبيض بيفصل الطريق الراجل إتزنق في السير فراح معدي على الخط الأبيض بسنتيمترات في الإتجاه المعاكس
الديلي ميرور نشرت الكليب على موقعها وإيكسكلوسيف إن الراجل كسر إشارة المرور ومشي في الإتجاه المعاكس ، وإتبهدل الراجل في الجرايد وإتفضح في وكالات الأنباء العالمية ، وإعتذر النهاردة والبوليس وجه له مخالفة حاجات كده عجيبة

عجيبة ليه ؟؟ لأني تخيلت والعياذ بالله إن زعيم الأغلبية في مجلس الشعب ، وبلاش نقول زعيم الحزب الحاكم عشان دي خارج حدود التخيل بمراحل ، تخيلت السيد عبد الأحد جمال الدين زعيم الأغلبية وهو رايح مجلس الشعب على العجلة ، قلت ياريته يكسر كل الإشارات بس يروح بالعجلة

على فكرة إحنا عندنا تجربة قبل كده للنائب المحترم السابق البدري فرغلي ، اللي كان بيروح المجلس بالعجلة ، وأيامها وجه له مجلس الشعب إنتقادات عشان الحركة الوحشة دي ، لكن الراجل تمسك بكده وقال أنا للأسف ماعنديش عربية ومافيش عندي غير العجلة ، ولأن العجلة من الندامة الراجل مانجحش في الدورة الأخيرة

و آآآآآه منك يا ... ديمقراطية