Saturday, March 22, 2008

ديمقراطية العجلة


وآآآآآه منك يا ... ديمقراطية



إمبارح جابوا خبر في الجزيرة عن ديفيد كاميرون ، وديفيد كاميرون ده المفروض إنه زعيم حزب المحافظين المعارض في إنجلترا، يعني زعيم المعارضة في مجلس العموم البريطاني يعني رئيس حكومة الظل ،الحقيقة كنت مشغول على النت فما كنتش مركز في الخبر لكني بصيت على الشاشة لقيت الراجل المحترم الكوبارة راكب عجلة وهما مصورينه ، قلت أكيد بيصوروه عشان دي حاجة عجيبة ، لكن بأه اتاري الحكاية غير كده ، الراجل صوروه وهو ماشي بالعجلة والإشارة حمرا ، وبعدين ماشي في شارع مزدوج ضيق رايح جاي مافيهوش جزيرة في النص بس فيه خط أبيض بيفصل الطريق الراجل إتزنق في السير فراح معدي على الخط الأبيض بسنتيمترات في الإتجاه المعاكس
الديلي ميرور
نشرت الكليب على موقعها وإيكسكلوسيف إن الراجل كسر إشارة المرور ومشي في الإتجاه المعاكس ، وإتبهدل الراجل في الجرايد وإتفضح في وكالات الأنباء العالمية ، وإعتذر النهاردة والبوليس وجه له مخالفة حاجات كده عجيبة

عجيبة ليه ؟؟ لأني تخيلت والعياذ بالله إن زعيم الأغلبية في مجلس الشعب ، وبلاش نقول زعيم الحزب الحاكم عشان دي خارج حدود التخيل بمراحل ، تخيلت السيد عبد الأحد جمال الدين زعيم الأغلبية وهو رايح مجلس الشعب على العجلة ، قلت ياريته يكسر كل الإشارات بس يروح بالعجلة

على فكرة إحنا عندنا تجربة قبل كده للنائب المحترم السابق البدري فرغلي ، اللي كان بيروح المجلس بالعجلة ، وأيامها وجه له مجلس الشعب إنتقادات عشان الحركة الوحشة دي ، لكن الراجل تمسك بكده وقال أنا للأسف ماعنديش عربية ومافيش عندي غير العجلة ، ولأن العجلة من الندامة الراجل مانجحش في الدورة الأخيرة


و آآآآآه منك يا ... ديمقراطية

12 comments:

  1. أختلاف ثقافات
    واختلاف اخلاق
    واختلاف مجتمعات
    وهنعد نقول فى اختلافات كده لحد منموت ومش هنخلص

    البدرى فرغلى سقط لأن بورسعيد نجح فيها الأخوان ولا علاقة للعجلة بالموضوع

    ReplyDelete
  2. ديمقراطيه حضرتك سمعت الكلمه دي فين

    والله لوحبوة يطبقوة الكلام دة في مصر يبقي اغلب الشعب هيتحاكم

    ReplyDelete
  3. البدري فرغلي كان لاز يسقط لانه ماكانش شايف شغله كويس

    النواب كلهم همة ونشاط..اللي هرب بقروض واللي غرق عبارة وهرب واللي استورد اكياس دم فاسدة..كله شايف شغله تمام

    مش البدري فرغلى عمال يلعب بالبسكلتة
    :)

    اهو هم يبكي و هم يضحك

    ReplyDelete
  4. ؤ.
    رومانو برودي من حوالي سنتين وقبل ما يبقي رئيس الوزراء كان فيه صوره ليه وهو واقف في الشارع مستني الاشارة لما تفتح عشان يعدي ويكمل طريقه سيرا ..

    يعني عندهم الرئيس أو رئيس الحكومة بيعامل كبني أدم مش أله .

    وبخصوص بقي مجلس الشعب
    يعني البدري فرغلي لو كان راح المجلس بعربية بي ام تمنها نص مليون سارق فلوسها ولا واخدها رشوة ولا حاجة ساعتها محدش كان هيعتب عليه أنما عشان الراجل شريف أنتقدوه

    بس يمكن هي الحكاية فيها جانب عادات وصور ه معينه في عقول الناس لا تريد غيرها
    .

    ReplyDelete
  5. كالعادة ياشقير تدويناتك مالهاش حل
    وبمناسبة الديقراطية والعجلة , انا فاكر قبل كده فى عهد عاطف عبيد قريت فى جرنان الاهرام ان البريطانين اللى كانوا بيركبوا المترو الصبح اتفاجئوا بتونى بلير جاى يركب المترو معاهم .. تخيل رئيس وزراء بيركب المترو
    وفى فيلم الملكة برضه كان بيمشى من غير موكب ولا احزنون
    ياعم الناس عايشة فى وادى واحنا
    عايشين فى وادى تانى خالص
    ولو احنا وصلنا فى يوم ان وزير بس يمشى فى الشارع عادى بين الناس حيكون هما عندهم الملك بيقعد على القهوة ويلعب استيمشن مع الرعية على المشاريب

    ReplyDelete
  6. بصراحة مش عارفة أقولك ايه ولا أعلق بايه على نوابنا الحلوين فى المجلس

    أنا الفترة اللى فاتت اتنقلت قسم البرلمان فى الجرنان وبما انى لسه تحت التدريب فشغلى كله منصب فى كتابة اخبار الاستجوابات وطلبات الاحاطة والاسئلة اللى بتتوجه من النواب للمسئولين
    ومهما قلتلك ومهما وصفت لك عن الفضائح والمهازل اللى بقراها وبسمعها مش هاقدر انقل لك الصورة الحقيقية
    لأنهم بيستخدموا الاستجوابات وطلبات الاحاطة فى معظم الأحيان كوسيلة للشهرة فى الجرائد أو الابتزاز

    ويكفى أن استشهد بمثال واحد ووهو أن أحد نواب المعارضة قدم طلب احاطة لوزير الاتصالات علشان فاتورة الموبايل بتاعته جت 37 ألف جنيه فى الفترة اللى
    كان مسافر فيها برة مصر وكان مشغل الخط جوال

    وواحد تانى مقدم استجواب لوزير الاعلام عن مزاحمة الصحفيين للمذيعين فى التلفزيون

    وحاجات من ديه ياما

    هما دولا النواب بتوعنا

    مش تقولى عجلة ولا مش عجلة

    ReplyDelete
  7. ليه المسؤلين عندنا بيمشوا و معاهم حراسة ؟

    الاجابة المعتادة اللى حتسمعها علشان لهم أعداء

    مين هم الاعداء مش عارف

    يعنى مثلا مين ممكن يكون عدو وزير الكهرباء

    حاله من النقص بتجيلهم اول لما بيقعدو على الكرسى


    و الحساب يجمع انشالله

    ReplyDelete
  8. للبيج رنج
    www.worldgames1.com

    ReplyDelete
  9. احييك بشده علي هذه المدونه
    بالفعل مدونه ابهرتني
    و ابهرني بها الصياغه العاقله و لأول مرة في عالم المدونات مدونه تبهرني و لا تتوقف عند مرحلة الاعجاب بالفكرة او المدونه
    حقا انا احييك عليها
    و اتمني منك ان تستمر
    و سوف يثير ذهنك كيف اتيت الي هنا ...
    اذا تصفحت مدوناتي سوف تعرف انك قمت بكتابة احد الموضوعات التي تناقشها احدي مدوناتي

    تحياتي لك و للمدونه الرائعه التي اعتبرها مدونه عاقله علي ارض الجنون

    و شكرا ... تقبل تحياتي

    نوجا

    ReplyDelete
  10. هى ممكن تكون تمثيلية ديموقراطيه
    يعنى حركة معموله بالقصد
    وبالنسبه للملوخية اللى عندنا لا عزاء للسيدات

    ReplyDelete
  11. البدري فرغلي سقط بسبب خطاب رفعت السعيد المعادي للاخوان والذي كانت تذيعه اقناة الاولى كل نصف ساعة ايام الانتخابات !!

    من دخل الانتخابات مكانه هو عبد الملك الزيني وهو قيادي عمالي مستقل

    ReplyDelete
  12. كان فى مذيع فى التلفزيون إسمه شفيغ شلبي ، كان بيروح مبنى ماسبيرو بالعجلة ، ويقدِّم برامجه ومن ضمنها قراءة الأخبار وهو مش متنشّي زي بقية المذيعين والمذيعات. لم يتحمّله ماسبيرو فتخلّص منه

    ReplyDelete