Sunday, March 23, 2008

فتاوي عربية .. بنكهة مصرية


سمعتوا آخر فتوى ؟

زهقتوا من تسييس الدين ، زهقتوا من الفتاوي التفصيل اللي بتطلع في توقيتات متزامنة مع أحداث معينة ، زهقتوا من فتاوي من نوعية اللي يسافر متسللاً ويغرق مايبقاش شهيد عقب غرق المصريين قرب سواحل إيطاليا ، أو فتاوي من نوعية إن مروج الإشاعة يطبق عليه حد قذف المحصنات بثمانين جلدة وطبعا ده بعد ترويج إشاعة تتناول صحة الرئيس ، زهقتوا من ده كله .. طيب ماتيجي نشوف بره بيعملوا إيه .. وإزاي الفتاوى بتتظبط كده زي ماحنا عرفنا نعملها وطبعا الريادة لينا

تعالوا نشوف في سوريا عملوا إيه .. طبعا كلنا عارفين إن قمة دمشق مهددة بالفشل عشان دول عربية كتيرة متوقع إنها تقاطعها على مستوى الرؤساء والزعماء ، وإنهم هايشاركوا بوفود ذات مستويات أقل كثيرا تبحث عن التمثيل المشرف ، وده طبعا بسبب موقف سوريا من إعاقة انتخاب قائد الجيش العماد ميشيل سليمان رئيساً للبنان .. طيب ياترى موقف الدين إيه ؟



الشيخ أحمد بدر الدين حسون مفتي سوريا العام وعلى الطريقة المصرية ماسابش الموضوع يعدي ، وأصدر فتوى لصحيفة العرب القطرية عن الدول الوحشة اللي ناوية تقاطع القمة على مستوى الزعماء وتشارك بوفود شرفية
يقول الشيخ أحمد حسون
إن حضور القمة العربية في دمشق هو فرض عين على كل حاكم عربي وإن تخلف أي حاكم عربي بلا عذر صحي أعتبره آثماً ، فليس على المريض حرج ولا عذر سياسي لأي حاكم أن يتخلف عن قمة دمشق كما أنه لا يجوز لأي حاكم إرسال من يمثله


أعلق ... ولاّ تعلقوا إنتوا ؟

20 comments:

  1. عم أحمد
    لا أنت تعلق ولا حنا نعلق
    خليها كذه
    ماتحتاج تعليق أبداً أبداً
    حاااااجة تقرف

    ReplyDelete
  2. أخ أحمد
    يذكروني بجدتي
    "اذا ما كملت صحنك يجري وراك يوم القيامة!!!"
    أسلوب طفولي
    يزري بالمكانة عند الناس
    تعال شوف مكانة الفتوى عند الناس اليوم هنا في السعودية

    ReplyDelete
  3. حتى الحكومات اللى قرفنا بموضوع فصل الدين عن الدوله!!!!!
    زمان كان الشسخ ليه هيبه و احترام دلوقت خلاص
    تقدر تقول مبقتش اتهت كتير بكلامهم
    كل واحد بقي ايه شيخه اللى يروح له عشان يقول اللى هو عايزه و لو ملقاش اللى عايزه حيروح لواحد تاني

    مسخرة

    ReplyDelete
  4. ان كات نية المفتى صادقة فقد صدق
    اما وان كانت فتواه ممالئة للسلطة فقد اثِم معهم

    ولا يستطيع كائن من كان ان يشق قلبه ليعرف نيته

    ReplyDelete
  5. أنا مش فاهمة ليه رجال الدين مصممين على اقحام الدين في الاحداث المهلبية دي والله دي اساءة بالغة لاي دين، اللهم اذا كان السبب هو الفرقعة على طريقة أخبار هيفا..
    بس الكاميرا لها سحرها برضه ودي فرصة للظهور واللت المجاني
    انا اخلاص هيحصل لي جاحة قريب من العبث والاستهباليزم اللي حاصل في كل الدنيا من اقصاها الى ادناها
    اه يا نافوخي!!
    بس قبل ما يحصل احب اسجل اعجابي بمدونتك سيادتكم وبالمناسبة دي التخلف عن زيارتها يعد إثماً في حق الذات لأ دا بجد مش فرقعة ولا حاجة!!!

    ReplyDelete
  6. ههههههههههههههههههههه

    عنب كده واى

    ربنا يكثر من امثاله

    تلاقى الجماعة اللى مش رايحين قلبهم متقطع دلوقتى

    ReplyDelete
  7. ولا تعلق انت ولا نعلق احنا .. ده بقي كلام فارغ ما يستحقش الوقت اللي نشغل بالنا بيه اصلا .. حرام و الله و منهم لله !!

    ReplyDelete
  8. السلام عليكم ورحمة الله وبركاته

    رايي من راي استاذ محمد عبد الغفار

    احا ما نعرفش ايه اللي في نفسه بالظبط وهل هو يداهن السلطه ولا بيقول كده بنيه صادقه


    تحياتي

    ReplyDelete
  9. هو عنده حق فرض عين على كل بتنجان
    كلنا عارفين ايه اللى هيتقال وايه نتيجه القمه يوفروا فلوس الضيافه والانتقال ويجيبوا بيها قمح لشعوبه بدل ما الناس بتموت عشان رغيف عيش الواحد اتخنق من شيوخ التين السلطانى اقصد شيوخ السلطان
    ناقص يقول ان الذهاب الى امريكا فرض عين على كل مسلم ومسلمه عشان تنشيط السياحه هناك او زياره القدس عشان التطبيع فرض عين على كل حاكم وكل مسلم كفايه تخلف بقى يا جدعان هما الشيوخ اتهبلوا ليه كده

    ReplyDelete
  10. عجبتنى الصورة اوى

    ReplyDelete
  11. أعتقد أن عدم الذهاب فرض عين
    بدل من الرغى والكلام اللى مش منوا أى فايدة وفى الآخر هيطلوع 3 تنديد على 2 شجب و 1 دعم وكلوا يرجع على بلدوا.

    ReplyDelete
  12. السلام عليكم
    فى الماضى كنت اجلس متسمرة امام
    التلفزيون لاتابع جلسات مجلس الشعب
    وبدون تريقة فعلا كنتى بدعى ان العضو المنتخب من بلدتنا يكون حاضر المرة دى ربما يوفقه الله ويحدث فرقا
    هكذا كنت
    رحم اللة الامام اى حنيفة رضى الله عنه
    يلا لعلها خير

    ReplyDelete
  13. قمة ايه ما اتعقد قمم بعدد شب الوطن العربى كله واخرتها ايه يا امة خناقة يا اما نومه وتطنيش
    واظاهر ان خبل الفتاوى مبقاش عند شيوخ مصر وبس ده الفيروس عدى الحدود

    ReplyDelete
  14. يمكن تصنيف فتوى الشيخ حسون فى باب الفتاوى الكوميدية فهى لا تغنى ولا تسمن من جوع وتاثيرها منحصر فقط فى الاشخاص الصادرة بحقهم وهم معروفون بالاسم والتاريخ بانهم شوية نصابين وحرامية لو تركوا لشعوبهم خمس دقايق بدون حماية كونداليزا رايس سيكون مصير افظلهم حظا مشابة لمصير الشهيد انستازيو سوموزا
    فهى فتوى منعدمة التأثير على العامة وتخص حدث فقد اهميتة بفقدانة اعمدة اقامتة واقصد هنا الرجال الذين يعطون للحدث قيمتة ويضفون علية مهابة هى بعض من مهابتهم هم شخصيا فلا القادة الذين يتمنعون الحضور للقمة البائسة ذوو وزن او قيمة او حتى شرف بعد ان فقدوة اسفل حذء بوش
    ولا القمة المنتظرة يمكن ان يصدر منها ما يمكن ان يكون صدمة للاعداء فهم من يقرر ما يجب ان يبصميبصم دى حقيقة وليس مجاز لغوى وانت عارف وانا عارف وتقريبا كل اللى بقرا الكلام دة عارف بس خايفين عليك الف سلامة يا ابو حميد علية القادة العرب منذ زمن
    وقد استشهدت انت ببعض الفتاوى المثيرة للجدل من مصر وانا اذكرك بفتاوى اريقت بسببها دماء المسلمين واحتلت بلاد هى حاضرة الاسلام وعواصم كانت من العواصم من الجسيم من الاحداث
    هل تتذكر فتاوى الجهاد فى افغانستان ضد الاحتلال السوفيتى وحملات جمع التبرعات للمجاهدين فى طابور الصباح فى المدارس
    اين الان فتاوى دعم افغانستان ضد الاحتلال الامريكى ام ان الاحتلال الامريكى فرض عين على كل بلاد المسلمين والروسى من الكبائر والبريطانى مكروة
    اين فتاوى الاستاذ الدكتور بن جربين_ليس فى الاسم اى خطأ_من عدم جواز نصرة او حتى الدعاء بالنصر للمقاتلين فى جنوب لبنان
    اين كان المشايخ عندما فتحت بلادهم امام القوات الامريكية للمساعدة فى احتلال العراق
    ثم ان اية حكاية ان سوريا بتعطل انتخاب رئيس لبنانى دى جبتها منين دى وازاى تسمح لنفسك تروج اشاعات مصدرها مشكوك فية ولية نسيت ايران بالمرة واتحاد عمال ترينداد وتوباجو ودورهم فى تعطيل الحياة النيابية فى لبنان
    طيب العالم اللى عاملين دوشة على موضوع انتخاب الرئيس اللبنانى مش مكسوفين من نفسهم وهما معاهم فى نفس الاجتماع شخص اسمة نورى المالكى رئيس وزراء عينة الاحتلال وما زالت بلادة تحت الاحتلال وسط اعمال مقاومة يومية ضد المحتل
    واين هى الشرعية التى تتيح لة الانضمام لمثل هذة القمة

    ReplyDelete
  15. إلى الأستاذ أحمد شقير كبير المدونين و إلى جميييع المدونين المصريين، ومحبي بهاء طاهر، ومحبي الأدب المصري، ومحبي مــصـــر :
    أدعوكم، وتدعوكم ورقة وقلم .... إلى الاحتفالية المقامة بمناسبة فوز بوكر العربية ببهاء طـاهر ، وذلك يوم الثلاثاء القادم .... الأول من إبريل ... في نقابة الصحفيين الدور الرابع ... السادســـة مساءً

    .

    . والدعوة عــــااااامــــــة ....طبعًا

    ReplyDelete
  16. طيب الحق البس العيال بقى و اعملهم سندوتشات و نسافر على سوريا نحضر القمة
    بس عندي سؤال
    حضور القمة يستوجب الوضوء و لا عادي؟
    يلا يا اولاد نروح نحضر مولد القمة ده في هناك مراجيح و ضرب نيشان و حاوي

    بس حتى لو كل العرب حضروا مش بس الرؤساء مش حيطلعوا غير بـ










    نبوت الغفير



    ازيك يا استاذنا
    تحياتي

    ReplyDelete
  17. طب ماهو الراجل قال العذر الى المفروض انه موجود عند معظم حكام العرب
    ده الواحد فيهم معدى السبعين

    بلا وكسة
    خليهم يعفنو فى كراسيهم

    ReplyDelete
  18. فصــّل فصــّل في فتاوى أشكال و ألوان
    و إعمل على نفس مقاسها بدلة و فستان
    بكره البني آدم يبقى بالفتوى حمار
    وساعتها الأخ حمار يبقى إسمه إنسان
    وعجبي
    KING TOOOT

    ReplyDelete
  19. جملة واحدة فقط هي تعليقي على منطق هذه الفتوى:

    أو كما يقول أبو الليل!

    ReplyDelete
  20. ناهيك عن الفتوى

    ولكن بالفعل كل حاكم عربي عليه فعلا التواجد لمنع الفرقة ووحدة الرأي حتى لو مختلفين لازم كلهم يقعدوا مع بعض ده واجبهم تجاه شعوبهم

    يعني مثلا أنا مشغلة عندي الحاكم ده ورأيي يروح يشوف حل في المشكلة الفلانية
    هو مش عايز يروح دي أصلا مهام وظيفته

    ReplyDelete