Thursday, April 03, 2008

لماذا .. سيفشل إضراب 6 أبريل


إضراب 6 أبريل .. فاشل




المظاهرات .. الإعتصامات .. التجمهر .. الإضرابات .. كل ماسبق تعتبر أمور إحتجاجية الغرض الأساسي منها هو الإعتراض والرفض لقضية معينة يصعب تغييرها بالطرق المباشرة وهي أفعال تعمل على لفت النظر لتلك القضية وأحيانا نوع من أنواع الضغط بإبراز مايمكن ان ينتج عن عدم قبول مايطرحه المحتجين
وهذا الإعتراض أي كان شكل التعبير عنه يجب أن تكون الرؤية واضحة في الآتي .. الأهداف .. طريقة التعبير .. وسائل التعبير .. الإعداد .. المشاركون .. ردود الأفعال .. فرص النجاح

كانت هذه مقدمة بخصوص هذا السيل من التدوينات التي تدعو لإضراب عام يوم 6 أبريل

أولاً
: الأهداف .. بالرغم من أن هذا الإضراب هو أكثر الإضرابات غموضاً من ناحية الأهداف ، فلا أستطيع أن أضع يدي على طلبات محددة إذا تم الإستجابة لها يتم إنهاء الإضراب أو عدم تكراره ، إلا أنني أكاد استشعر أن الهدف ممكن أن يكون نوع من أنواع لفت النظر لأمور حياتية وسياسية حالية لم يعد يرضي عنها الكثير ، وبهذا لاتوجد أهداف واضحة الرؤية للإضراب يمكن قياسها وتحقيقها

ثانياً : طريقة التعبير .. يجب أن تكون طريقة التعبير واضحة ، ويبدأ ذلك بتحديد هل هو مظاهرة أم إعتصام أم إضراب ثم تحديد مدة زمنية لها بداية ولها نهاية ومكان محدد أو أماكن محددة ، الشكل العام لإحتجاج يوم 6 أبريل على مايبدو هو إضراب يشمل جميع مرافق الدولة ، وهذا يعتبر من أصعب أنواع الإضرابات إذا علمنا مدى صعوبة القيام بإضراب في إحدى المؤسسات أو الشركات تحتوي على المئات من العاملين لأهداف محددة ، فما بالك بإضراب يشمل جميع قطاعات الدولة .. لذلك فطريقة التعبير بهذا الشكل تعتبر طريقة مستحيلة

ثالثاً : وسائل التعبير .. لاتوجد لافتات .. لاتوجد شعارات .. لاتوجد تغطية إعلامية ولا إستخدام وسائل إعلام بشكل مكثف تخدم فكرة وهدف الإعتراض .. فقط مجموعة من البانرات والتدوينات التي تدعو للإضراب في المدونات على الإنترنت وهي وسيلة حتى الآن تعتبر غير مؤثرة في عدد كبير من المدعويين للمشاركة في الإضراب ، لذلك فوسائل التعبير على الإحتجاج غير كافية لأن تصل للجميع محتجين ومحتج عليهم

رابعاً : الإعداد .. الإحتجاجات بشكل عام تحتاج إلى قيادة تستطيع تسيير شكل الإعتراض وقيادته وإبداء الرأي الحازم في أي تطورات تخص الإعتراض حتى لاتتناثر الأراء وتتوه القضية بين الخلافات في الرأي ، وقيادات هذا الإعتراض أشخاص تخيليين أو سيبريين ، ولم نسمع مسبقا عن إضراب بهذا الشكل ينبع من الفيس بوك

خامساً
: المشاركون .. عادة يشارك في الإعتراض كل من له صلة مباشرة بالقضية المعترض عليها وهذا الإعتراض يخص كل من يعمل في البلد ، وبما ان الفكرة نابعة من بعض الشباب لايضرهم كثيرا أن يتغيبوا عن محل دراستهم يوما واحداً أو مجال عملهم الحالي ، فهؤلاء ليست لديهم إلتزامات ومسئوليات كبرى كالمتزوجين تمنعهم من مجارة هذا الإعتراض بالطريقة المطلوبة ، فبعيدا عن متصفحي النت من هذه الفئة فالوعي لدى الآخرين محدود لدرجة يستحيل معها المشاركة ، لذلك ستصبح المشاركة ضغيفة بل تكاد تكون معدومة

سادساً : ردود الأفعال .. من أخطر مافي مظاهر الإعتراض بأنواعها المختلفة رد الفعل ، ففشل الإحتجاج يؤدي إلى نتائج سلبية مؤثرة مثل هبوط الروح المعنوية بشكل كبير ، العزوف عن المشاركة في إحتجاجات أخرى ، الكفر بالمشاركات الجماعية ، إستئثار بعض الأشخاص بعقوبات جماعية تساعد المعترض عليهم في تفادي مثل تلك الإحتجاجات مسثقبلا ، لذلك رد الفعل تجاه هذا الإعتراض سوف تكون سلبية جدا عقب إنتهائه

سابعاً : فرص النجاح .. صفر

أخيراً ... يجب الأخذ في الإعتبار أن ماذكرته سابقا عن الإعتراضات لاينطبق أبداً عن مايسمى بالثورة .. الثورة شيئ آخر مخالف تماماً

هذه تدوينة ليس هدفها أبداً أن تسبح عكس إتجاه التيار ، أو أن تأخذ تياراً مناهضاًً للإضراب ، ولكنها وجهة نظر تحليلية أعتقد فيها ، هذه تدوينة قد تغضب البعض ولكني وجدت أن الأمانة من جانبي أن أعرضها

46 comments:

  1. طبعا انا معاك
    و رأيي من رأيك
    و رأيي كتبته في المدونة بتاعتي
    www.tafaselena.blogspot.com

    ReplyDelete
  2. كل ما كنت بادخل على مدونتك الفايرفوكس يهنج
    المرة دي فتحت بالإنترنت إكسبلورر و صدمت بما كتبت
    و لكن أولاً و أخيرا هى وجهة نظرك

    ReplyDelete
  3. تحليل متميز جدا
    و فعلا من اهم سمات اى عمل ناجح هووضوح اهدافه المرجوة منه
    و دة كان غايب عن منظمى هذا الاضراب
    فكنت اقترح مثلا ان يكون هدف هذا الاضراب هو اشقاط الحكومة مثلا
    ولكن الجميع فضل المطالب الفضقاضة و غير المحددة لجذب الانتباه الاكثر وجعل الجميع يشعر ان هذا الاضراب منوط به من كثرة وتنوع المطالب التى تؤدى الى اننا عايزين نضرب علشان الحياة تبقى لونها بمبى
    تحياتى

    ReplyDelete
  4. مع حضرتك مليون في المية في كل كلمة بتقولها

    ReplyDelete
  5. حد يفهمهم الكلام ده يا إخوانا هيصة وما حدش عايز يسمع كلمة العقلاء :
    فرص النجاح صفرررر

    ReplyDelete
  6. انا شايفة ان فكرة تجمع الشعب كله فى فكرة واحدة وهى الاعتراض على الاسعار وتجمعه وعمل اضراب املأ ان الحكومة تستجيب انا شيفاه رد فعل كويس

    بس المشكلة هنا ان الشعب يتجمع فعلا ويكون عارف هو عاوز ايه وبشكل جادى

    ReplyDelete
  7. اتفقت معاك فى كام نقطة بس مختلف معاك فى نقطة ان نسبة النجاح صفر !!! مستحيل طبعا الناس كلها بتتكلم فى الموضوع و عايزيين يشاركوا بأى طريقة لو مش بالمظاهرات يبقى مش حايشتروا حاجة اليوم دا !! اول مرة الاقى ستات و رجالة كبار بيشجعوا الشباب انهم مايرحوش الشغل او المدارس او الجامعات

    الناس خلاص طقت و حطت صوابعها العشرة فى الشق من الحكومة و فشلها فى السيطرة على زيادة الاسعار

    و انا بأعتبر نجاح الاضراب مش لازم يكون ليه نتيجة فورية بس على الاقل المشاركة و الناس اللى كانت نايمة ى العسل بتصحى !!و كله بقى يتكلم فى حقه و هو دا المهم

    هاهاهاها و انا بأكتب دلوقتى واحد قريبى بيشتغل فى وظيفة حكومية بيقولى انهم نبهوا عليهم فى الشغل اللى حيغيب يوم الحد حيتنقل حتى لو ابوه مات

    يا ريس الحكومة رجليها بتخبط فى بعضها وخايفة فى يوم من الايام تتقلش بسبب اضراب زى دا

    ReplyDelete
  8. عندما سمعت عن الإضراب منذ أيام الفقرة رقم 6 فى البوست كانت أول شىء فكرت فيه - الكل عارف إن النظام عندنا لايمكن أن يفوت أى حدث بدون إستغلاله لتثبيت أقدامه يعنى هو ممكن يوارب الباب سنة صغيرة للتنفيس وفى نفس الوقت إضعاف وتثبيط الهمم

    وإن كان فى مجال ولو صغير لحدوث أشياء غير متوقعة وخارج دائرة الحساب لأن الأمور ساءت بدرجة جعلت الغالبية العظمى من الناس بايعة ومش هاممها حاجة حتى يمكن ناس من داخل النظام نفسه لكنها مطحونة زى بقية الناس ، ممكن تتحرك شوية

    ReplyDelete
  9. خخخخخ

    شكلك واكل مكبوس ولا مندي

    عشان كدة الكلام غير سهل الهضم

    بص يا باشا

    ما ينفعش اقول انهاردة نسبة النجاح كام

    وابتدي احلل في حدث لم يحدث

    سيب الحدث يتم وبعدين تعالى حلله

    لكن كلامك ده معناه الناس تقعد كدة وما تفكرش تعمل اي حاجة

    فكرتني بهاني رمزي في وجهة نظر

    ما ينفعش ما ينفعش

    اللي يقدر يعمل حلجة يعملها

    طب هقولك يا معلم

    الاضراب نجح من قبل ما يبتدي

    هو القرار الجمهوري برفع الجمارك عن السلع ده مش تأثير الغضب الشعبي

    الريس نفسه في الاهرام انهاردة بيقول لو حد بيبيع غالي الشعب ما يشتريش منه

    يعني يضرب

    مبارك‏:‏ عملنا جميعا هو تيسير حياة المواطن التي أصبحت صعبة
    أبلغت الحكومة بأن العلاوة الاجتماعية‏15 %‏ لا تكفي ويجب زيادتها
    الغلاء العالمي ليس عذرا للحكومة‏‏
    وعليها التسهيل علي المواطنين بقدر ما تستطيع
    الرئيس في تصريحات صحفية خلال تفقده مشروع العوينات‏:‏
    رفعنا الجمارك عن سلع كثيرة جدا‏
    ‏ ولابد للتجار من تخفيض الأسعار
    الرقابة الشعبية مطلوبة
    ‏ وعلي المواطن ألا يشتري سلعة بغير سعرها المخفض

    ده المانشيت الرئيسي بتاع الاهرام

    الاضراب والمضربين مش عايزين يسممو البهايم صدقني

    ده بس نوع من تسميع الصوت

    احنا لسه عايشين

    وعندنا الطرق اللي ممكن نعترض بيها

    تحياتي يا معلم

    ونشوفك يوم الاحد ان شاء الله

    ReplyDelete
  10. بصراحة
    وجهة نظر منطقية فعلا

    تحياتى لك

    ReplyDelete
  11. كان فيه قبل كده دعوة .. خليك في البيت وارفع علم مصر
    :)
    على اساس ان دي بداية العصيان المدني وكده
    http://khalekfelbeet.blogspot.com/

    أنا فعلا مش عارف ايه الهدف، والمفروض ايه المطالب

    ReplyDelete
  12. والله يا مولانا هو ده كلام سليم
    بس احب ازود عليه ان الموضوع ده بيتلازم معاه العديد من نظريات المؤامره نظرا لان فعلا ماحدش عارف مين منظم البتاع ده اطلاقا!!!!
    اول نظرية مؤامره بتقول انه مزقوق من بره لاسباب كتيره منها مثلا تمهيد لفلسعه بابا حسنى فى اقرب فرصه

    وتانى نظريه بتقول الحكومه مدبراه وده لخمستلاف سبب
    اولا عشان نبان قدام الناس اننا دوله ديموقراطيه والشعب بيعمل اضراب

    او الهاء الناس عن مصيبه تانيه بتحصل كالمعتاد

    او عشان الناس تفش غلها بكام مظاهره وتخش تنام تانى زى ماكانوا نايمين واظن انت هارش انه اضراب فاشل... يمكن هو معمول عشان يفشل اساسا لو نات فاهم قصدى لان انت اكيد عارف فشله معناه ايه

    او عشان بابا حسنى اتكل ومش عارفين يعلنوا الخبر فبيعملوا بلبله قابله للسيطره والاخضاع عشان تبقى ذريعه منطقيه لفرض حاله من السيرطه الامنيه مبالغ فيها عشان يضمنوا مفيش حاجه تحصل بعد اعلان الخبر

    نظريات المؤامره لا تنتهى يا عزيز
    الموضوع غامض غامض
    ويمكن يكون شوية ناس متفائله مين عارف
    بس عامة ان امبرتاحش للحاجات اللى بتبقى مرتبطه بكم لا نهائى من نظريات المؤامره كده

    ReplyDelete
  13. يسلم مخك
    و انا مافقة الكلام ده
    و رأيى برضه قلته فى مدنتى http://ana-we-nafsy.blogspot.com/2008/04/6.html

    ReplyDelete
  14. السلام عليكم ورحمة الله وبركاته

    مع حضرتك يا استاذ احمد في كل كلمه ، وعلقت بكده عند اكتر من حد كتب عن الاضراب في الايام الاخيره

    تخيل اصلا ان فيه ناس كتير جدا مش عارفين اصلا ان في دعوه لاضراب يوم 6 ابريل ولا سمعوا اصلا بيه ولا يعرفوا اساسا معني كلمة اضراب يبقي ازاي ؟؟!!!!!!

    اتوقع الفشل الزريع ، وانا عن نفسي مش هاشارك و هافتح الصيدليه عادي جدا

    ReplyDelete
  15. معلش يا أحمد أعذرني على كلامي ، أنت وأنا عايشين بره مصر ، وموش عارفين هما حاينظموا الأضراب أزاي ، لكن أكيد في رؤية ومطالب واللي وصلني من صور بتقول عايزين تعليم كويس وعايزين مرتبات كويسه ، ورفض واضح لأرتفاع الأسعار ، ومشكلة رغيف العيش ، وعجبني قوي عبارة يامصبر الوحش فعلا الشعب المصري شعب طيب وصابر قوي قوي قوي لكن يوم ماحيثور ماحدش حايعرف يقف قدامه ، وأنا صحيح موش عارفه اللى حايحصل يوم 6 أبريل ، لكن حسيت أني لازم أتعاطف مع اللي حايحصل مهما كان سواء نجح الأضراب ام فشل ، فأنا مع كل أحتجاج سلمي لايخرب بلدنا ، ويوصل صوتنا للحكومة ، وأرفض أي أحتجاجات من شأنها الضرر والتخريب ،
    وصدقني أحتجاج منظم أفضل وأهون كثيرا من شعب ثائر يخرج يحرق السيارات في الشوارع ويكسر فتارين المحلات وغيرها ، وأعتقد أنه حدث في مصر مثل هذا الأحتجاج المدمر من قبل والذي حرق شارع الهرم بأكمله وحرق سيارات الناس قي الشوارع

    ===========================
    أنا مع التحضر في الأحتجاج

    ReplyDelete
  16. وأضيف لك ياعزيزي

    رغم تحليلك المنطقي والسليم جدا الا أنني أراك هنا مثل باقي أفراد الشعب المصري ، ناقم على حسني مبارك وموش عايزه في الحكم ولو سألته أنت رحت أنتخبته ؟؟؟ يقول لك لأ ،،،،، لأ ليه ؟ لأنه يا أما معندوش بطاقه أنتخابيه من الأساس ، يأما بق فقط يقعد يعيد ويزيد ، لكن فعل مافيش ؟؟؟؟؟؟؟؟؟؟؟

    عمل أيه أيجابي علشان ينتخب رئيسه أو أعضاء مجلس الشعب بتاعه ،،،،،،،،،،مافيش ؟؟؟؟؟؟؟؟؟؟؟؟

    ReplyDelete
  17. جميل
    والبديل ؟؟؟

    ReplyDelete
  18. بينا احنا الشعب احنا بس اللى نحدد نسبة النجاح المهم ان يكون لدينا نحن المفهورين العزيمو وقدرة الرفض للواقع المزرى اللى اوقعنا فيه النظام احاكم ,......... يلا نضرب

    ReplyDelete
  19. تحدي الحكومة و استعراض القوة الشعبية في حد ذاته شيء كويس، خصوصا في حالتنا ال بقينا فيها مستسلمين تماما في الناحية دي.
    أو اعتبره تدريب يا أخي، زي كدا التدريب على الغارات :)

    لكن الحقيقة أن في أسباب كثير وجيهة، مش لازم كل المضربين يكونوا متفقين على سبب واحد، و مطلب واحد، لأن المشاكل أكثر من أنها تحصر في قائمة أو ترتب حسب الأولويات. كل شخص عنده أسباب كثيرة تهمه و تدفعه للمشاركة.

    بيقول لك: أول مرة أصعب مرة.

    ReplyDelete
  20. هو زى ما قال ألف فعلا.. حتى وإن لم يأتى الإضراب ثماره التى نرجوها.. ودا شبه مأكد.. الا إنه أفضل تدريب للشعب، ومثال حى للأطفال فى المستقبل، وإعلان عن حالة الحنق "العامة" للمُغيابين عن وسائل الإعلام

    ReplyDelete
  21. انا جربت في البيت وسألت عن الاضراب اشوف مين عارف
    لقيت هدير عارفة ومقتنعة جداااااا بيه ..طبعا عارفة من الفيس بوك
    وحماسة شباب الفيس بوك بقي طلعت

    واكتشفت ان ماما مش عارفة ايه الموضوع..رغم ان الست متابعة يعني..وطالعة نازلة

    وبابا...عارف وغير مؤيد

    ده يعني احصائية مصغرة عن البيت المصري

    الحقيقة مانكرش اني مقلقة من الموضوع ده كله
    لو الطلبة و حماسة الشباب هي اللي نفذت الاضراب
    هل من الممكن الاقي سائق تاكسي غلبان عايز يعمل قرشين يومها ح يعمل اضراب بدل فلوس الغدا والعشا؟
    هل معني ده ان مدرس الدروس الخصوصية بتاع اختي ح يعتذر يومها عن الدروس؟
    هل ممكن اروح الكلية والاقيها فاضية و الدكتور عنددي لغا المحاضرة؟
    طيب اصلا ح لاقي بقيت زمايلي مضربين اصلا؟

    طيب هو الاضراب
    will really ring a bell??

    خايفة ليتهمونا بالتساؤلات دي يا باشا بان ده "الشك و التشاؤوم" بتاع ابناء برج الجدي
    :D

    ReplyDelete
  22. التجمع على فكرة واحدة في حد ذاته شيء جميل

    حتى لو ماكانش بالعدد المطلوب

    يمكن يبقى تدريب لمرة جاية تكون فيها المطالب أوضح و التنظيم أكثر إحكاما

    تصدق إن أيام ماكنا بنقاطع موبينيل عشان أسعار المكالمات و الصلاحية ..كل أما كنت بلاقي ناس بتعمل كده كنت باقول فيه أمل

    رغم إنها حاجة هايفة

    بس عشان الواحد فقد الأمل في إن المصريين ممكن يتجمعوا لأي سبب من الأسباب

    اللهم إلا الإحتفال بالمنتخب

    ReplyDelete
  23. نضرب و نقاطع و نهلل ولاّ ما نضربش
    نكتب و نعبّر و نناقش ولا ما نكتبش
    الُحكمة زمان قالوا المشرط حل الإنسان
    إللي جراحة رغم الترياق لسه ما بتطيبش
    و عجبي
    KING TOOOT

    ReplyDelete
  24. وجهة نظر سديدة
    واتفق معك في كل حرف كتبته

    ReplyDelete


  25. أنا ليه هعمل الاضراب ؟؟


    لما الفسـاد وقــّـفوه حـارس على وطنى
    ولهيب الغلا كوانى .. وحتّ ف بدنى
    لما الحرامى سرق منى اللقمة والميه
    وسرق هدوءى وسكنى .. حتى من سكنى
    لما الحلم حتى اتسرق .. من يومى .. من زمنى
    لما النظام نسج - فى عز الشباب - كفنى
    أنا قلت هعلن العصيان
    فى يوم حزين مـَدنى

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم


    لما سألت عالعيش .. قالوا مفيش
    وقالو العيش على الأبونية
    وسألت عالزيت .. وعزّيت
    لما عرفت إن الزيت بتسعة جنيه
    وسألت على حديد البُــنا
    قالوا الحديد .. خلاص فى كرش البيه

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم


    لما البشر والحجر
    ووادى النيل ببنى أدمينــــه
    لما زمان الوطن بايامة وشهورة وسنينه
    لما الصغير والكبير
    قالوا كفاية مش عايزينــة
    كفاية علينا حكم سنين
    تخرج الواحـــــد من دينـه

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم


    لما المبيد صبح سرطان
    يهرى ف ارضنا .. فى الزرع .. فى مواطن
    لما بؤ الميه صبح وسخ داكن
    لما خرب الاقتصاد .. واحد على تلـّـــهَ
    قاعد وشارب وواكل وساكن
    لما الشباب بيصرخ .. فى ذل ومهانة
    ولا شغل ولا توظيف ولا شقة ومساكن

    انا قلت هعمل الإضراب
    ولم الدنيا والعالم
    فى يوم ابيض على المظلوم
    اسود كئيب على الظالم

    تحياتى
    أحمد الصباغ


    ReplyDelete
  26. كل ما ذكرته سليم واضيف انى اعتقد انه عن عمد ، ففى ظل حاله لا نهائيه من الغموض الذى يغطى الحدث والمشاركين والمتفرجين

    تصير اى نتيجه نجاح ويكون من حق اى أحد ان ينسبه لنفسه كمان

    ReplyDelete
  27. احمد انا بعتذر اني استندت لرأيك في موضوعي بس عارف انك هتوفق علي الاستعارة تحياتي لك وان كنت ترفضها فسوف استجيب لطلبك تحياتي

    ReplyDelete
  28. اوافقك الراى على ان الصورة النهائية للاضراب المقترح ينطبق عليها تحليلك تماما و لكن المشكلة ان يوم 6 ابريل لم يكن مقترح ان يكون اضراب عن العمل اساسا و لكن الفكرة اول ماظهرت و تداولت على الانترنت كانت عبارة عن دعوة لمقاطعة الشراء تماما فى هذا اليوم للاعتراض على موجة الغلاء الكاسحة..و هذا هدف واضح و اذا استمر الوضع على ذلك كانت ستصبح الرؤية اةضح و النتائج اقوى و لكن بما ان الدعوة كما طرحت سيبرية و من طرحها اشخاص او جهات غير معلومة فقد دخل على الخط جهات كثيرة و شخصيات اكثر تريد نسييس هذا اليوم و تحويله لاضرابات عن العمل و مظاهرات احتجاجية او بمعنى اخر كل واحد من الجهات دى اليوم ده من وجهة نظره هو مما حول اليوم من دعوة لمقاطعة الشراء لاحداث تاثير اقتصادى يقاوم الغلاء الى دعوة لفعل اى شىء يكدر الحكومة و خلاص و ده شىء خطير جدا لان الفوضوية المحتملة فى هذا اليوم ستضر كل الاطراف و لن تؤدى باى نفع لاى احد فى حين كان التركيز على شىء محدد نتفق كلنا عليه و هو شىء ممكن و ليس مسيس كمقاطعة الشراء فقط كان سيحدث اثرا اقوى

    المهم

    انا عن نفسى لن اضرب عن العمل و لكن سالتزم بالفكرة التى قرائتها فى البداية و هى مقاطعة الشراء لعل و عسى

    It is not enough to do your best; you must know what to do, and THEN do your best.

    تحياتى
    هشام

    ReplyDelete
  29. يعني واحد بيغرق مستكترين عليه يضبش


    ده حتى حرام
    عايزينه يغرق في صمت


    تحياتي

    ReplyDelete
  30. استاذ احمد
    عبرت حقيقى عن اسئلة كانت تدور بذهنى ولم اجد لها رد .
    يمكن لانى بعيد عن البلد؟ بس الاحوال ولو من بعيد لا تسر
    اتمنى ان يحقق هذا الاضراب "ان تم" بالشكل الصحيح المراد منة وعلى رأى

    سمباتيك الناس بتغرق وبتضبش
    afnan1989

    ReplyDelete
  31. ياسيدى الفاضل
    كنت اتمنى من سعادتك عدم كتابة ماكتبت لا لشيئ الا لانه يدخل فى بند الاحباط والذى يعانى منه الغالبية العظمى من شعبنا المطحون ان لم اقل كل الشعب ..ياسيدى علينا ان نعطى دفعة لهذا الشعب وخاصة الفئة التى يطلق عليها المثقفين والا فالنهاية هى ماستؤل اليه الدولة المصرية بشعبها وكيانها وارضها اقصد الضياع ..علينا ان نزرع الامل لا اليأس فعندنا منه مايزيد لكى يوزع على شعوب الكرة الارضية وحتى المجموة الشمسية المحيطة بكوكبنا وكما كتب الاخ الفاضل والذى سبقنى بان هناك نتائج قبل ان يحدث الحدث ولقد قام سيادته متفضلا بالكتابة عن ذلك الامور ياسيدى لم تعد تحتمل نحن نتدنى الى اقصى درجات التدنى لذلك آن لنا ان نقوم من الكوما العميقة والتى طالت اكثر من 72 عاما ازرعوا الامل وليس اليأس والامل لن يأتى الينا الا باقصاء العصابة من حكم مصر

    ReplyDelete
  32. لذلك آن لنا ان نقوم من الكوما العميقة والتى طالت اكثر من 27عاما ازرعوا الامل وليس اليأس والامل لن يأتى الينا الا باقصاء العصابة من حكم مصر

    ReplyDelete
  33. لست معك
    أولا : الاضراب أساسا معمول لا لأن ينجح ولكن ليكون مقدمة لعصيان مدني مجرد تجربة كلنا عارفين انها لن تؤتي بثمارها ولكن ستدب الرعب فى قلوب القيادة السياسية(ابو زعبل) وصدقونى هيكون فيه اضراب امبر "عصيان مدنى " قريب
    ثانيا : أهنئك على مدونتك الرائعة وأدعوك وجميع أصدقائك لزيارة مدونتى المتواضعة الجديدة http://elhayah.maktoobblog.com/

    ReplyDelete
  34. رأي موافقك عليه
    الثورة فعلا مش كده بس هنقول ايه بقى في المعارضة بتاعتنا اللي زيها زي الحكومة هما الاتنين ماشيين على حل شعرهم
    تحياتي

    ReplyDelete
  35. هو ممكن ميكنش شكل مثالي
    بس يعمل حاجه ولو ضعيره

    انا بصراحه مش مع وله ضد
    بس فعلا عايزه اعرف رايك اكتر
    لان عرض حضرتك منظم جدا

    ReplyDelete
  36. انا مش متفق معاك طبعا فى كلامك

    سيبك من منطقية الحدث أو نسب نجاحه

    وفكر فى معناه للشعب وللحكومة

    الشعب او اللى سمع منه عن الاضراب متحمس جدا ليه ومستعد يوصل صوته بأى طريقة بدل القعدة جنب الحيطة والندب على الحظ التعس زى النسوان

    الشعب نفسه اتقطع من الغلاء والطين المحطوط على راسه وكل اللى عايزه مجرد محاولة للصراخ وتوصيل الصوت

    أما الحكومة فبدأت تخاف فعلا من الاضراب والدليل على كده كل مانشيتات فى الصفح الاولى من الجرائد الحكومية اللى بتقول انخفاض ملحوظ فى الاسعار وكلام من العينة دى

    والدليل على كده بيان وزارة الداخلية اللى بيحذر فيه من الاضراب ده واللى اتقال بطريقة محصلتش من زمان اوى

    والدليل على كده محاولات تهدئة الشعب من مبارك بالكلام عن رفع الاجور ورفع علاوة الغلاء ورفع رسوم الجمارك عن سلع كتيير

    الاضراب خوفهم قبل ميبدأ

    فكرة التجمع الشعبى فكرة مخيفة فى ذاتها لاى كيان حكومى ظالم

    انا معاك فان عمل اضراب شعبى بجميع افراده وطوائفه يعتبر شىء مستحيل

    مش شرط كله يعمل الاضراب

    لو اللى سمع عنه قدر ينفذه هتلاقى جزء كبير جدا قدر يوصل صوته وده نجاح

    لو الشعب بدأ يفكر بالاسلوب ده هتلاقى ن الاضرابات الجاية هتكون انجح وانجح

    ولو بدأ صوت ناسنا يطلع محدش هيعرف يسكته

    ولو ناسنا حسو ان صوتهم عمل حاجة هتلاقى مارد طلع من قمقمه

    اعتبره انتفاضة ضد الغلاء

    اعتبره صرخة ناقمة على الاوضاع السوده

    اعتبره زى ما تعتبره

    بس متحكمش عليه انه فاشل من قبل ميبدأ حتى

    احنا وضعنا بقى يصعب عالكافر

    والمصيبة ان اللى حاكمينا مش مستوعبين ده

    واللى فوق مش حاسين باللى تحت

    يمكن الصوت يوصل

    ويمكن ميوصلش

    بس حتى نبقى كسبنا شرف المحاولة

    ReplyDelete
  37. لن أشارك في الإضراب غدا

    ولن ألبس أسود

    ReplyDelete
  38. مع احترامى الكامل لوجهه نظرك بس يكفى اهميه الفكره واهدافها الغير واضحه على قولك انها خلتك على الاقل تتكلم عنها انت وغيرك كتير سواء بالسلب او الايجاب لان ده كله ايجابى

    ReplyDelete
  39. بس على الاقل فكرتو بدون خوف

    احنا ما نقدرش نخطو هيك خطوة

    ReplyDelete
  40. طبعا أنا تعليقي متأخر ، ولكني كنت قلت رأيي وهو تقريبا قريب من رأيك جدا منذ أربعة أيام في تدوينة بعنوان

    عاجل جدا ... رأيي في إضراب 6 أبريل

    وفعلا صدقت توقعاتي تقريبا

    تحياتي

    ReplyDelete
  41. رغم جهلي التام بكل الاحداث ده لكن يمكن أكون كونت نظرة بسيطة عن الامر من يوم ما صدمني بيان وزارة الداخلية فاستنيت تعلق منى الشاذلي و معتز الدمرداش بما غنهم نافذتي الوحيد على مصر في الغربة

    لكن كل الي فهمته و قدرت أكونه إن الناس معترضة و محتاجة تاخد موقف و الداخلية مسكتلهم الجرباك

    ده الصورة اللي اترسمت من النظرة المحدودة اللي قدرت آخدها

    أ،ا معاك ان أي حركة غير منظمة و مالهاش هدف واضح أكيد فاشلة و مستحيل تؤدي لأي شيء


    بس على حد اللي فهمته ن الناس هي اللي رغبت في الحركة
    ماحدش فيهم فاهم ايه الاضراب و يفرق ايه عن الاعتصام

    بس اللي فاهمينه انهم تعبانين و عاوزين البلد تحس

    وبيتهيألي ده حق مشروع

    مش عارفة أنا صح ولا واخداها مشاعر و بس؟؟؟؟

    ReplyDelete
  42. ها يا بو حميد؟
    إيه رأيك؟
    الإضراب فشل؟

    ReplyDelete
  43. نعم اذا فكرنا ودرسنا وتحركنا
    ستكون النتائج أفضل ونسد الثغرات لكل من ينتقد الاضرابات

    يعني حاليا ممكن الحكومة تقول الناس حتكسر البلد
    غاندي حرر بلاده بالصمت
    احنا أذكى كتير وممكن نخطط وننفذ أفضل من كده

    ReplyDelete