Monday, April 07, 2008

مجدي الدقاق .. والفئة المدسوسة


عورة الفضائيات




وهو إيه حكاية الفئة المدسوسة دي ومين اللي بيدسها وإللي بيدسها ده بيروح فين ؟؟ عمو مجدي الدقاق رئيس تحرير مجلة ميكي مصدعنا إمبارح طول النهار في الفضائيات ووكالات الأنباء والبرنامج العام والبي بي سي وبيتهيألى طلعلي في قناة إقرأ على إن فيه فئة مدسوسة هي اللي قامت بالإضراب وأن الكل يعلن ولائه للنظام وأن الدعوة للإضراب هو عمل من أعمال الطفولة .. طبعا أي تعليق على الكلام ده يدخل تحت بند كلام يعاقب عليه القانون .. الجميل إن عمو مجدي وخلينا في إسمه الأول بس عشان الإسم التاني مش مريح بالنسبة لي وبيدي إيحاءات برده يعاقب عليها القانون ، المهم الجميل بأه إنه عضو لجنة التثقيف في الحزب الوطني وطبعا واضح من الإسم إن اللجنة دي المفروض هي اللي بتثقف وتنور وهو بصراحة نورنا إمبارح بكلامه السكر وأعمال الطفولة اللي قلبت بجد وناس وقعت على الأرض مقتولة وهو لسه بيقول إن الكل أعلن ولائه للنظام .. ولاأدري لماذا كلما أراه استدعي عنوان تدوينة مراقب مصري .. مجدي الدقاق .. خالتك قرعة


أعمال طفولية

بالرغم من أنني في البداية أعلنت أنني لست مع الإضراب وسردت أسباب ذلك في تدوينة سابقة .. إلا أن من حسنات حركة أمس الإحتجاجية هو كشف عورة برامج التوك شو ، فتلك البرامج التي كانت تلاحق كل إعتصام او مظاهرة او إضراب حتى لو قام به عشرة أشخاص .. ده العاشرة مساء تابعت مرة إضراب مواطنة واحدة آه والله مواطنة واحدة كانت على سلم وزارة الصحة .. البرامج اللي صدعتنا الفترة الماضية كانت بالأمس مثل الفئران المذعورة وقدمت جميعها في بدايتها تغطية الطقس الجوي ودي إشارة مفهومة إن الخماسين هي سبب إلتزام المواطنين منازلهم وتجاهل متعمد للإحتجاجات ، معتز قعد يتكلم في الكورة ومنى قعدت تتكلم على غاندي وأديب بيقول إن فيه ناس غريبة دخلت المحلة .. ومنى التي تغزل فيها أحد المدونين بالأمس حيث يجلس متسمراً أمامها كالتلميذ بدت مرتبكة وشطبت برنامجها بدري بدري وكأنها تعلن إحتجاجها بطريقة لايعاقب عليها القانون .. وإذا كانت لتلك البرامج بعض المصداقية فإنها فقدت كثير منها بالأمس وظهرت على حقيقتها وكله أصبح البيت بيتك ، ولم يفلت منهم إلا أحمد المسلماني والطبعة الأولى في غفلة من الزمن
---------------------------------


سؤال غير برئ .. ماذا يفعل جنود الأمن المركزي بسيارتهم

10 comments:

  1. اذا كانت وسائل اعلامنا قد فقدت شرعيتها فأبحث عن الخبر فى المدونات

    ReplyDelete
  2. بالرغم من إنى مكونتش موافقه على فكرة الإضراب و غير مقتنعة بجدواها من الأساس لإنها هتكون عاملة زى اللى بيضرب دماغه فى الحيط بالظبط لكنها كشفت لنا عن حاجات كتير اوى مش ان فيه فئة مدسوسه لكن ان فيه مشكلة حقيقية و إن الشعب المصرى أصبح مستفذ لدرجة كبيرة جدا و إن صمته مش عجز و لا قلة حيلة
    يا ريت الحكومة تفهم الرساله

    ReplyDelete
  3. الإضراب وضح اد ايه الامن كان مذعووور
    وده في حد ذاته تطور
    اول مره نحس اننا مؤثريين ولينا كيان وان الامن عملنا حساب
    إيجابيات جديده أظهرها هذا الإضراب

    ReplyDelete
  4. فعلا فعلا انا كنت زى حداد ما قال بدور عن الاخبار فى المدونات

    بجد خالته قرعه

    ReplyDelete
  5. الذ حاجة في الحزب الوطني دة وهي الحاجة اللي هتجيبه ورا وهتبقى سبب وفاته هي الته الاعلامية
    يعني بيختاروا شوية ناس زي الفل الصراحة يعني
    مجدي الدقاق لكرم جبر لعبد الله كمال
    ناس ذوق ذوق الصراحة يعني
    انا حاطط عليهم امل كبير جدا انهم هيفضلوا ورا حزبهم الى ان يطرحوه ارضا...وينتحروا
    تحياتي واحتراماتي

    ReplyDelete
  6. الاعلام الفضائي سقط سقطة مريعة في اثناء تغطيته لاحداث 6 ابريل

    واحب اقولك ان مش مجدي الدقاق بس اللي خالته قرعة..لأ ده كرم جبر كمان كان منافس شرس لمجدي الدقاق في الدفاع عن الحكومة ومحاولة النليل من الفئة المدسوسة

    _______________________

    اعتقد ان المجند بيحاول يفك ال
    windshield
    وتركيب واحد جديد حتي يمكن الرؤية بصورة جيدة اثناء القيادة...لكنه بيفكه بغشومية زايدة حبتين

    :))

    ReplyDelete
  7. شكلك مستغرب وكاننا كنا نتوقع شئ اخر

    نتيجة ما حدث لا تتحلمة الحكومة وحدها

    ReplyDelete
  8. فعلا.. أعتقد أن الاخوة الصحافيين المعلقين في الفضائيات كونوا ثروة هائلة من ظهورهم بس وقت الاضراب.. كل ستوديو يدخلو فيه ويطلعوا ياخدو الظرف بتاع أجر الحضور للحلقة او كضيوف ثابتين في محطات بعينها
    أحلى شغلانة
    :)
    **
    عسكري الأمن المركزي بيركب حاجز ضد الحجارة على زجاج السيارة

    ReplyDelete
  9. الفئة المدسوسه سوسه سوسه كف عروسه

    ReplyDelete
  10. يلي انتي عشقك حرية

    في العشق اه ولا شئ ممنوع

    ReplyDelete